Sema Çaglak 

 

AMED - Herdem Merwanî ke pîyê ci Abdulhalîm Kirtay yew tepişteyo nêweş o, diyar kerd ke aye semedê rewşa pîyê xo zaf endîşeyîn a û vat: “Xeylêk nêweşîyê pîyê mi estê û bi roj benê revîr, bi şewe zî anê zîndan. Ez wazena pîyê mi û heme tepişteyê nêweşî serbest bêrê veradayîş.”

 

Rewşa tepişteyan her ke şina tewr giran bena û pêwa nînan çîyêk nîno kerdiş. Bi taybetî zî tepişteyê nêweşî nînê tedawîkerdiş û teda û zordarî serê înan de yeno kerdiş. Tepişteyo 73 serre Abdulhalîm Kirtay ke Zîndanê Tîpê T yê Hûmara 2 yê Şakranî de maneno, rojê derbaz bîye de keyeyê xo dir bi telefon qisey kerdibi û vatibi: “Mîyanê nê hewteyî de beno ke şima xebera mergê mi bigîrê. Xo amade bikerê.” Herdem Merwanî derheqê rewşa pîyê xo û şert û mercê tepişteyan de ajansê ma rê qisey kerd.

 

‘Polîtîkayê serê tepişteyê nêweşan goreyê rewşa înan vuryeno’

 

Herdeme diyar kerd ke pîyê ci 29 serrî yo zîndan de yo û vat: “Semedê veradayîşê ci nêzdîyê serrêke mendo labelê nê demî de tepişteyê ke cezaya înan kêm menda, polîtîkayê serê înan vuryeno. Yan wazenê mîyanê ê şert û mercê xirab de tepişteyî dinyaya xo bedelnê û bişawê keyeyê înan rê. Yan zî bi nêweşîyê giran û sey nîm merdim wazenê înan bişawê verê keyeyê înan. Pîyê mi nika zîndanê Şakranî de tepişte yo. Lê verê nê zî xeylêk zîndanan de ameyo surgunkerdiş. Ma hertim eşnawenê ke surgunê zîndanêk bîn kerdê. Serê rewşa pîyê mi de xeberêke zelal nêdanê. Şerêk bi psîkolojîk serê keyeyê tepişteyan de yeno kerdiş. Eynî wextî de qaşo ke yenê tedawîkerdiş, eynî çî yeno reynakerdiş.”

 

‘Ma seba weşîye pîyê xo endîşeyîn ê’

 

Herdeme dîyar kerd ke xeylêk nêweşîyê pîyê aye estê û vat: “No hewteyêk o rewşa pîyê mi zaf giran bîya. Çend roj verê telefonê mi kerd û neql kerd ke o di rojî yo  hucre de tepişte yo û serê ey de şîdetêk pîl esto û vat, 'Beno ke şima xebera mergê mi bieşnawê. Her çî rê amade bê'. Xora dimayê nê telefon destê ey ra kewt û êdî ma nêzanê rewşa ey senîn a û endîşeyê ma zî tewr zêde bi. Ma nêeşkenê xebere ci ra bigîrê û xeberegirewtiş ma rê bîya sey îşkence. Tewr peyîn çend roj verê vatî, do avûkatan dir pêvînayîşê rî bi rî bêro kerdiş. A roje ma rê sey îşkence bî. Ma şîne zîndan ke bivînê la vatêne nêweşxane de yo. Ma şinê nêweşxane vanê zîndan de yo. Dima ra uca ra zî vanê şêrê emniyet. Ma şî emniyet la vanê ke eleqeyê ma pê çin o û ma şawitî verê cendirman. Ma wina tewr zêde endîşeyîn bî. Semedo ke ma nêzanayîne ke pîyê ma ça de yo. Ma bendeyê ci vindertî, heta ke ma rê zanayîşêk bidê la tu çîyêk nêvatî. Ma zî mîyanê endîşe de vat, pîyê ma rê çîyêk bîyo. Dimayê nêzdîyê şan de verdayî ke avûkat pîyê mi dir qisey bikero. Avûkat pîyê mi dir  re tena 5 deqe qisey kerdo. Goreyê neqlkerdişê avûkatî, serume milê pîyê mi de bîya û halêk zaf xirab de bîyo.”

 

‘Ma bêveng nêmanê’

 

Herdeme vat vera tepişteyê siyasî polîtîkayêk taybet yeno kerdiş û vat: "Pîyê mi û heme tepişteyê nêweşî bi polîtîkayêk taybetî dir rî bi rî yê. Ganî pêroyî de komel hemverê nê nêzdîbîyayîşî vejîyo. Gama ke ma helwestêk bi yew nîşan nêdê bi tena hîn kesan nê şert û mercê zîndanan nînê dûzkerdiş. Ma keyeyî heta cayêk eşkenê serê nê de şêrê la ganî vengê keyeyan bireso, vengêk bi girseyî. Ez tena seba pîyê xo ney seba heme tepişteyê nêweşan veng dana ke wa serbest bêrê veradayîş. Ma seba rewşa înan mîyanê endîşeyî de yê. Kam çi kono serê milê înan wa semedê tepişteyê nêweşan bikerê û bêveng nêmanê.”