Medya Uren

 

MÊRDÎN - Dayîka Aştîye û dayîka tepişteyê nêweşî Abdullah Gunay, Besna Gunay derheqê tecrîdî û binpaykerdişê heqan de qisey kerd. Besna dîyar kerd ke tecrîd sûcê merdimayî yo û wina vat: “Xoverdayîşê ma tu wext do nêvindero. Heta zîndanan de binpaykerdişê heqan nêqedîyo, heta ke tecrîd nêro şikitiş, metod çi beno wa bibo ma do têkoşîn bikerê. Xoverdayîşê hemverê tecrîdî do nêqedîyo. "

 

Çarçewaya hemleyê "Dem Demê Azadîye yo” her çar parçeyê Kurdistanî de çalakîyê tewir bi tewir ameyî kerdiş. Reyna zîndanan de seba hemleyî paştdayîşêk xurt ame dayîş. Tepişteyan 290 rojan çalakîya grevê vêşanîye hemverê tecrîd û binpaykerdişê heqan zîndanan de dewam kerd û nika zî qerar dayî do bi çalakîyê tewir bi tewir paştdayîş bidê hemle.

 

Na babete ser o Endama Meclîsê Dayîkê Aştîye û dayîka tepişteyê siyasî yê nêweşî Abdullah Gunay, Besna Gunay şikinayîşê tecrîdî û binpaykerdişê heqan de qisey kerd. Besna dîyar kerd ke peynîkerdişê çalakîya grevê vêşanîye nîno manaya ke xoverdayîş nîno kerdiş û peynî bîyo. Besna sozê dewamkerdişê xoverdayîşî da û vat, ê do tecrîd bişikinê.

 

‘No tecrîd sûcê merdimayî û zulm o’

 

Besna bale ant serê hêrişê dewleta tirkî yê hemverê kurdan û wina vat: “Çîyo ke ma destê înan ra anto, bi vatiş nêqedîyeno. Dayikê kurdî timî yan bi hesretê vînayîşê tutanê xo yê, yan seba mezelêke tutanê înan çin o nalenê, yan zî rayîrê zîndanî de emrê înan derbaz beno. Lajê mi rojnameger bi, seba zilm û hêrişê dewlete tewrê embazan bi û bi 6 serrî yo şehît kewto la mi mezelê ey zî nêdîyo. Lajê min o bîn Abdullah Gunay (43) siyasetmendar bi, serra 1999 de seba teqînêke sûke de amebi meydan, ame tepiştiş. Çek dayî serê ci û îfadeyê ke amade kerdê, pê dayê îmzakerdiş. Yanî Abdullah sûke nêveşnabî. Bi 22 serrî yo ez verê berê zîndanan de ya. No tena cuya mi nîya. Sey mi bi milyonan dayîkî estp. No tecrîd o, tecrîd sûcê merdimayî yo û zulm o. Ne kulturê ma ne ziwanê ma yeno qebûlkerdiş, ne rojnamegerê ma azad yenê verdayîş ne zî ma. Hemverê nê de vindertiş wezîfeyê ma yê merdimayî yo. Eke ma nêwurzê ma do şîrîkê nê gunayan bê.”

 

‘Xoverdayîşê hemverê tecrîdî do nêqedîyo’

 

Besna dewam de wina vat: “Lazim o ma bar tena serê milê tepişteyan de nêverdê. Nika xora ma zehmetî de yê, lazim o ma çîyêk bikerê. Bi peynîkerdişê grevê vêşanîye zî nîno manaya ke xoverdayîş peynî bîyo. Tepişteyî wayîrê îradeyêk bi hêz ê. Metod çi beno wa bibo ê do xo ver bidê. Mi seba pêro tepişteyan soz dayo lajê xo ke heta ez bibî, ez o paştdayîş bidî înan. Ma do pîya serbikewê. Ma bawer ê. Ma kesêk ra nêtersenê û ma do wareyan de bê. Xoverdayîşê hemverê tecrîdî zî nêqedîyeno.”

 

‘Lazim o ma pîya bibê vengê tepişteyan’

 

Besna tewr peyîn veng da her kesî û vat: “Eke ewro ma veng nêvejê, ma do şêrê û şêrê. Lazim o ma pîya bibê vengê tepişteyan. Abdullahê mi tepişteyê nêweşan ra yo ke nîno tedawîkerdiş. No çend mengî yo wazeno bêro tedawîkerdiş la nêbenê tedawî. Her heqê xo ra yenê mehrûmkerdiş. Eke kesêk vajo ez kurd a û bi wijdan a ganî wurzo. Ê tutî tena tutê mi nîyê, no welat tena welatê mi nîyo, her çî seba şima yo. Ewro dem demê azadîye yo.”