ŞIRNEX - Rayberîya Meclîsê Ciwanan ê HDPyî de Silopî de musabeqeyê futbolî amebi organîzekerdiş. Musabakayê ke ame organîzekerdiş, fînalê ci ame dayîş. Fînal de di tîmê cinîyan ameyî têhet û musabaka bi hawayêke têduşt 3 -3 peynî bi. 

 

Meclîsê Ciwanan ê Partîya Demokratîke ya Şaran (HDP) ê Şirnexî, seba vîrardişê endamê Komîteya Îdarekara Meclîsê Ciwanan Ozan Yildiz ke dinyaya xo bedilna, bi sloganê “ Tora pabeyî zor berê turnûvayê ke dabî destpêkerdiş, fînala ci ewro ame dayîş. Fînalo ke Tesîsê Şaredarîya Silopî de ameyo kerdiş de, parlamenterê HDPyî Dersîm Dag, Nûran Îmîr, Hasan Ozgûneş û Hûseyîn Kaçmaz  û bi hezaran kesî tewr bî. Xeylêk kesî musabeqayê fînalî serê banê xo de temaşe kerdî.

 

Turnûvayî de 74 tîm kewtî musabaqa. Meydan de pankartê “Ma bi ciwanî dest pê kerd, ma do bi ciwanî serbikewê”, “Hemverê talankerdişê xozaya Cûdî bêveng memane” û “Ciwanî komel ê, hêviya komelî meşikne” ameyî daliqnayîş. Turnûvaya ke ewro  fînalê ci ame kerdiş, di tîmê bi nameyê Gûlîstan Doku û Denîz Poyraz de ame kerdiş. Cinîyan, bi pankartê “Dem Demê Azadîye yo” û “Bi ruhê Ekîn û Denîzan ma do tecrîd bişiknê” û bi sloganê “Cinî ciwîyayîş Azadî” berz kerdî û kewtî meydan.  Musabaka bi têduştîyê her di koman 3-3 qediya.

 

Veng dîya dayîkan

 

Meydanê fûtbolî de sehne ame awankerdiş û şahî amî organîzekerdiş û govende amî kerdiş. Şahî de yewin endama Dayika Aştiye ya Silopî Asiye Tay qisey kerd û wina veng da dayikan: “Tutanê xo tiryakî ra dûr bifînê. Wayîrê tutanê xo vejîyê.”

 

‘Xoverdayîşê Kurdan do serbikewo’ 

 

Tewr peyîn Dersîm Dag qisey kerd û vat: “Ciwanê sey Gûlîstan Doku yenê vînîkerdiş. Bi kayê xo yê lêşin ciwananê ma xapênenê. No bi destê kamî û senî yeno kerdiş? Ma sey serebûtê Îpek Er de zî dî ke dişminîyê kurdan kenê û hêrişê ciwananê kurd kenê. Hemverê zulmî xoverdayîş zî esto. Vakur  û bajarê Tirkîya de têkoşînêk tarîxî yeno kerdiş. No xoverdayîş zî rayberîya ciwanê kurdan de yeno kerdiş. No xoverdayîş do polîtîkayê înan lêşin veng vejo. Rayberîya ciwananê kurdan de do xoverdayîşê Kurdan serbikewo.”

 

‘Ma do qetî serbikewê’

 

Dersîme tewr peyîn wina vat: “Seba ciwanan kultur û komelî ra dûr bifînê, ma vînenê ke kayê senîn lêşin danê kaykerdiş. Bi nê  turnuvayî ciwanan mesajêk da polîtîkayê şerê taybet. Ma hêvî kenê ke ciwanê ma tim wayîrê nasname û kulturê xo bivejîyê. Ma do heta peynî têkoşînê xo dewam bikerê. Ma do qetî serbikewê.”

 

Dimayê qiseykerdişan şahî bi sloganê “Bi xoverdayîş serbikewê”, bi dayîşê xelatan û kûpayî û kaykerdişê govende peynî bi.