ENQERE - Hemsereka Pêroyî ya HDPyî Pervîne Buldan kombîyayîşê Meclîsê Cinîyan ê HDPyî yê Enqere de qisey kerd û pare vat: “Ma talîbê îdareyê welatî yê, ma vera tedayan gamêke apey nêerzê.”

 

Meclîsê Cinîyan ê HDPyî semedê plansazîya dewrê neweyî Anqara de kombîyayîşêk kerd. Hemsereka Pêroyî ya HDPyî Pervîne Buldan kombîyayîş de qisey kerd.

 

Pervîne ard ziwan ke ê sey cinîyan ewro îdareyê welatî rê talîb ê û vat: “Semedê ney hêzê ma zî, rêxistinîya ma zî estê. Hayîya îqtîdarî pê ney esta coka vera ma têkoşîn keno. Vera cinîyanê partîya ma bi taybetî hêrişê pîlî estê. La ma do wayîrê destkewteyanê xo tim vejîyê û apey gamêke nêerzê. Pê dewaya qefilnayîşê HDPyî armanc vergirewtişê cinîyan, astengkerdişê demokrasî, haştîye û edaletî yo.”

 

‘Îqtîdar tecrîd tewr giran keno’

 

Pervîne bale ante tecrîdê vera Rayberê PKKyî Abdullah Ocalanî ser û vat: ''Îqtîdar semedo ke rejîmê teda rê dewam bikero tecrîd giranêr keno. Tecrîd û meseleyê giranî yê zîndanan rojdemê lezabezî yê nê welatî yê. Tecrîd verê demokrasî, edalet, haştîya komelkî û cuya hempare de asteng o. Netîceya polîtîkaya tecrîdî de zîndanan de tepişteyî terkê mergî ameyê kerdene.''

 

‘Ma do xebata xo dîyarîyê cinîyan bikerê’

 

Pervîne derheqê deklarasyonê HDPyî de zî wina vat: ''Partîya ma tewirê xo yê serê meseleyanê verênan ê Tirkîya û rojdemanê lezabezan û rayîranê çareserîye 27ê êlule de do eşkera bikero. Wayîrê tewr xurtî yê nê deklarasyonî helbet reyna cinîyî do bibê. Ma do bi înad, sebr û heskerdişî bixebitê.Ma destkewteyanê xo do bizêdînê, ser bivisnê û dîyarîya pêro cinîyan û welatî bikerê.”