AMED - Baroyê Amedî derheqê binpaykerdişê heqê tutanê tepişteyan ke rastê îşkence ameyê de Eywana Konferansî ya Tahîr Elçî de eşkerayîye çapemenî viraşt.

 

Baroyê Amedî derheqê binpaykerdişê heqê tutê tepişteyî û îdiayê îşkenceyî Eywana Konferansî ya Tahîr Elçî de eşkerayî da çapemenî. Metnê eşkerayî hetê Endamê Merkezê Tutan  Sedat Gorduk ra ame wendiş.

 

‘Bi 32 tutan dir 53 rey pêvînayîş ame kerdiş’

 

Sedatî eşkerayî de diyar kerd ke nê prosesî de bi 32 tutan dir 53 rey pêvînayîş ameyo kerdiş û vat: “Netîceyê pêvînayîşan de ame zanayîş ke xeylêk tutî bi şîdetê fizîkî û psîkolojîk dir rî bi rî mendê. Sewbîna reyna xeylêk tutî bi muameleyê nêbaş û bêrûmetî dir rî bi rî mendê. Heqê înan yê bingehîn sey werd û şimitiş, weşî û heqê înan ameyo binpaykerdiş. Seba nê heyetê ma bi pêvînayîşê xo dewam kerdê.”

 

‘Şîdet xeylêk tutan rê ameyo kerdiş’

 

Sedatî dewam de wina vat: “Prosesê muracatê ma yê bi tutan dir memûrê ke tutan rê şîdet kerdê ameyo tespîtkerdiş. Dimayê nê tutan rê derheqê pêvînayîşê ma de, zanayîşê ke vera huqûqî de yê ameyê perskerdiş. Tutê ke bi hawayêke sîstematik şîdet bi înan yeno kerdiş, seba pêvînayîşê bi heyetê ma dir zêde bêrê kerdiş, waştişname şawitî. Sewbîna ame zanayîş ke vernîya pêvînayîşê ma yê bi tutan dir, tutan tehdîd kerdê. Ma sey Merkezê Heqê Tutan ê Baroyê Amedî dîyar kenê ke ganî selahîyetdarî na babete de wezîfeyê xo bi ca bîyarê û ma do taqîbkerdoxê cipersayîş û muhakemeyî bê.”