RIHA - Nobeta 'Edaletî' ya Emîne û Ferît Şenyaşarî verê Edliyeyê Rihayî 184 rojî yo dewam keno. Ferît diyar kerd ke problemê weşîye yê dayîka ey zêde benê û vat, ê do seba pêvînayîşî şêrê verê dozgerî.

 

Çalakîya “Nobeta Edaletî” ya Keyeyê Şenyaşarî roja 184ine de verê Edliyeyê Rihayî de dewam keno. Keyeyî ewro bi rayîrê telefonî Fadil Şenyaşaro ke 3 serrî ra zêdeyêr tepişte yo qisey kerd û coka erey ame verê edliye. 

 

‘Ma do bibê berê edaletî yan zulmî’

 

Ferît Şenyaşar dîyar kerd her ke şino problemê weşîye yê dayîka ey zêde benê û vat: “Pêwa ke problemê weşîye yê dayîka mi estê zî her roje yena serê nê betonî de nişnena ro. No zulm o. Ma wazenê dozgerî dir pêvînayîş bikerê. Labelê waştişê pêvînayîşî red kenê. Wezîrê Dade vatibi, ‘berê edliye, berê edaletî yo’. Ma do ewro reyke bîn şêrê û bi dozgerê dosya dir pêvînayîş bikerê. Ma do hewl bidê ke derheqê dewaya xo de zanayîş bigîrê. Ka ma do biewnê berê edliye, berê edaletî yo yan zî berê zulmî yo. Ez hêvî kena ke do berê edaletî bo û dozgerî pêvînayîşê ma qebûl bikero.”