Rojda Aydin

 

ŞIRNEX - Dayîka tepişteya nêweşe Saadet Îdîn, Alîye Îdîn dîyar kerd ke kênaya aye seba krîz derbaz kerda, hetê aye ya rast felç bîyo, pêwa nê zî kênaya aye tepiştî û ceza kerdî û vat: "Tedawîyê kênaya mi nîna kerdiş. Ez seba rewşa weşîya aye endîşeyîn a.  Ma nê zulmî qebûl nêkenê. Eke tecrîd bêro wedaritiş do zulm zî peynî bibo. Do têkoşînê ma dayîkan peynîya tecrîdî bîyaro."

 

Hemverê binpaykerdişê heqan û vera tecrîdê Rayberê PKKyî Abdullah Ocalan 27ê teşrîna peyêne 2020 de grevê vêşanîye yê zîndanan ame destpêkerdiş, roja 286ine de pêwa heme teda û zordarîyan dewam keno. Tepişteyê nêweşî nînê tedawîkerdiş û rewşa înan roj bi roje giran beno. Nê nêweşan ra yewe zî Saadet Îdîna ke Zîndanê Tîpê Tyê Şirnexî de tepişteye ya. Saadeta ke serr û nîm tepişte ya, bi pêroyî 14 serrî û 6 mengî ceza ci rê birnaya.

 

Dayîka Saadete, Alîye Îdîn derheqê rewşa kênaya xo û grevê vêşanîye de qisey kerd.

 

'Kênaya mi krîz derbaz kerd û felç bî'

 

Alîye, ard vîr ke kênaya aye serrêke û nîm bi hawayêke bê huqûqî tepişteye ya û vat: "Kênaya mi di serrî û nîm zîndanê Şakranî de mende. O wext tehlîye bî. Hema serrêke kênaya mi temam nêbê reyke bîn tepiştî û nika serrêke û nîm tepişte ya. Kênaya mi verê ke bêro tepiştiş 10 rojî vernî krîz kerd û netîceyê krîzî de hetê aye ya rast felç bî. Kênaya mi nêeşkayîne dest û linganê xo bixebitno. Pêwa nê Şirnex de polîsî ma gêrayî û vatî, îfadeyê kênaya şima esto û wa bêro îfade bido. Dima ra zî ameyî kênaya mi berdî û tepişnayî.  Demê îfadeyê kênaya mi girewti zî bi hawayêke  fermî nêame girewtiş. Seba ke nêweşe bî gerek nêameyîne tepiştiş. Kênaya mi nêeşkayîne qisey bikero û rayîra şêro. Bi hawayêke bêhuqûqî aye tepiştî. Kênaya mi rê 14 serrî û 6 mengî ceza amî birnayîş."

 

'Mengêke de hîrê rey berdê nêweşxane'

 

Alîye dewam de wina vat: "Nika kênaya mi hetê aye rast baş nîyo. Aye dir baş eleqedar nêbenê. Doktoran vato, ganî emara aye bêro antiş. La seba ke nêweşxane de emar çin o, kênaya mi reyke bîn şawitê zîndan. Kênaya mi mengêke de hîrê rey berdê nêweşxane. Hewteyî de di-hîrê rey zî berdê doktorê zîndanî. Seba vîrûsê koronayî nêeşkena tim şêro nêweşxane. Wexto ke şina kenê karantîna. Kênaya mi nêeşkena xizmetê xo bikero. Embaza aye xizmetê ci kena. Ez seba nêweşîya kênaya xo endîşeyîn a. Ganî tedawîye ci teber de bêro kerdiş. turê ma heme bêsûc ê."

 

'Ma tutê xo seba bikerê zîndanan nêardê dinya'

 

Alîye, bale ant serê grevî û vat: "Kênaya mi, mi ra nêvana ke kewta grevê vêşanîye. Labelê wexto ke ma şinê pêvînayîş, ma ferq kenê ke grev de ya. Çalakîya verê de zî ca girewtebî. O wext zîndanê  Şakranî de bî. Hema ke zirar nêresayo tutanê ma wa waştişê înan bi ca bîyarê. Bi girankerdişê tecrîdî dir tehdîdê serê înan zêde bîyo. Ma tutê xo seba  Erdogan înan rê zulm bikero nêardê dinya. Ma tutê xo seba ke bikerê zîndanan pîl nêkerdê."

 

‘Tecrîd peynî bikerê'

 

Alîye vat, ganî tecrîdê serê Abdullah Ocalanî bêro wedaritiş û wina qedêna: "Wa heme dayîkî hemverê tecrîdî vengê xo berz bikerê û destê xo bidê serê wîcdanê xo. Ganî dayîkî bi xoverdayîşê xo na gonî bidê vindarnayîş û tecrîd peynî bikerê.  Vengdayîşê ma hukmatî ra oyo ke peynîya zulmî bîyarê. Ma cuyêka azad û têduşt wazenê. Kezeba ma dayîkan veşena."