Medya Uren

 

MÊRDÎN - Cinîyê Mêrdînijî bi şertê zorî serê erd de xebityenê, bale antî serê zehmetîyê ke vînenê û vatî, saete 6ê serê sibayî heta 7ê şanî verê tîjî de xebityenê û heqê keda xo nêgînê. Cinîyan eynî wextî de bale antî serê îmkanê kêmî yê wendişî û waştî ke perwerdeyê bi ziwanê kurdkî bêro dayîş.

 

Cinîyê ciwanî yê ke mîyanê şertê giran de seba debara xo têkoşîn kenê, qalê îmkananê xo yê kêmî û lazimîyê perwerdeyê bi ziwanê dayîke kerdî. Cinîyê kedkarî dîyar kerdî ke ganî seba karî îmkanê başî cinîyan rê bêrê awankerdiş û vatî: "Ganî seba cinî biwanê zî îmkanî bêrê awankerdiş. Lazim o perwerdeyê bi ziwanê kurdkî zî bêro dayîş."

 

'Lazim o îmkan pêro dewan rê bêro awankerdiş'

 

Xezal Şik ke hetê keyeyê xo kena wina vat: "Ma dewa Deyşanê Şemrexî de ciwîyenê. Tîya îmkanî zaf kêm ê. Lazim o îmkan pêro dewijan rê bêro awankerdiş. Seba ziwan, kultur aver şêro û seba feqîrî peynî bibo, awankerdişê îmkanan lazim o. Ma heqê xo yê wendişî ra zî bêpar manenê. Mi zaf waştêne ke bibî doktor la keyeyê mi feqîr o û ganî mecbûr hetkarîya keyeyê xo bikerî."

 

'Dayîka ma çi ciwîya ma zî ê çî ciwîyenê'

 

Denîz Bozkurt zî 8 serrî mekteb wanena, wina qal kerd: "Îmkanê ma çinbî. Taybetî zî dewan de bêîmkanî ra mektebî nîna wendiş. Yê ke terk kenê tewr zêde cinî yê. Bi rastî ma rê wendiş luksêk o. Şîyayîş û ameyîşê mektebî zehmet o û mesrefê ci zî zêde yo. Nika zî ma serê erdî de xebityenê. Ma zehmetî vînenê. Ma saete 6ine ra dest pêkenê û heta 7ê şanî dewam keno. Karê ma zî verê tîjî de yo. Serra ma wina derbaz bena. Ma şinê keye zî xebityenê. Cuya ma wina derbaz bena. Dayîka ma çi ciwîya ma zî ê çî ciwîyenê."

 

'Lazim o perwerdeyê bi ziwanê kurdkî bêro dayîş'

 

Hediye Bozkurt zî mektebê sereyîn qedênaya û vat: "Mi wendiş de israr kerd. Heta mi wend mi xeylêk zehmetî dî. Serrê peyînan de serê ebayî de derse ameyîne dayîş, la tablet, înternetê ma çinbi. Goeyê bajaran ma zaf peyser mendêne.  Îmkanê ma çinbî. Heto bîn ra zî xeylêk gerreyê ma sîstemê perwerdeyî rê esto. Mektebî bi tirkî yê. Ma dewan de bi kurdkî qisey kenê, ma senî şinê mektebî cuya ma vuryena. Lazim o perwerdeyê bi ziwanê kurdkî bêro dayîş. Lazim o bi taybetî seba cinî biwanî, îmkanî bêrê dayîş û seba kerdişê karî zî îmkanî bêrê dayîş."

 

'Ma waştişê demokrasî kenê' 

 

Sevcan Bozkurt ke mektebê sereyîn wanena wina vat: "Ma xeylêk zehmetî dî, ma nêwazenê neslo ke bêro eynî çî biciwîyo. Tutî sey îşkence bi ziwanê xerîb wendiş kenê û bi ziwanê xo perwerde nêvînenê. Ziwanê înan yeno înkarkerdiş. Coka zî rastiya înan yeno waştiş kebêro çinkerdiş. Zaf tay ciwanî seba ziwanê xo aver berê hewil danê. Ma waştişê perwredeyê bi ziwanê xo kenê. Ma waştişê demokrasî kenê."

 

'Ma xeylêk probleman vînenê'

 

Asli Şik zî tewr peyîn wina vat: "Ma xeylêk probleman vînenê. Mektebê ma dûrî yê, şîyîş û ameyîşê ma zehmet o. Coka keyeyê ma kênayan nêşaweno mekteb. Ma şinê zî ma zehmetîyan vînenê. Îmkanê ma çin ê. Mi vat ez o dûrî ra mektebî biwanî la keye vat îmkan çin o. Tirkîya de wendiş xeylêk zor o. Bi taybetî zî ma waştişê perwerdeyê bi ziwanê kurdkî kenê."