Hebîbe Eren

 

STENBOL- Dayîkê Aştîye ke 1996 ra têkoşînê aştî danê, dîyar kerdî ke astengîyê tewr pîl nêwedaritişê tecrîdî û polîtîkayê şerî yê. Dayîkan wina vat: "Vetişê şerî asan o, saetêke de her ca eşkeno bêro rijnayîş, la merdimî nêeşkenê aştî saetêke de bîyarê."

 

Grevê vêşanîye ya tepişteyê PKKyî ke bi amancê tecrîdê serê Rayberê PKKyî wurzo dabî destpêkerdiş roja 284ine pey xo de verdeno. Verê nê çalakîya 2018ine bi rayberîya hemsereka KCDyî û parlamentera HDPyî ya Colemêrgî Leyla Guven grev amebi destpêkerdiş û dimayê grevan pêvînayîş amebi destpêkerdiş. Sey her demî dayîkê aştîye seba vengê tepişteyan bidê eşnawitiş, têkoşîn dayî û rastê xeylêk astengîyan ameyî. Însiyatîfê Dayîkê Aştiye 1996 de bi waştişê aştîye ame awankerdiş û 25 serrî yo têkoşînê xo kenê. Dayîkan dîyar kerdî ke astengîyê tewr pîl nêwedaritişê tecrîdî yo û polîtîkayê şerî yê û vatî, ganî tecrîd bêro wedaritiş û seba grev peynî bibo selahîyetdarî game bierzê.  

 

Endamê însîyatîfê Dayîkê Aştîye ya Stenbolî, Guler Bugday, Emîne Elbek, Bedîa Gokuz û Emîne Unal hemverê tecrîdî vengdayîş kerdî.

 

'Waştişê tepişteyan bi ca bîyarê'

 

Gulere vat ke tepişteyî nêzdîyê 300 rojî yo grev de yê û vat: "Tepişteyî nê dir hewl danê ke vengê xo bi muxatab û selahîyetdaran bidê eşnawitiş. Rayaumumî de bêvengîyêk esto. Gelo gerek tepişteyî dinyaya xo bi bedelnê hema newe vengê înan vejîyo. Ma merg nêwazenê. Ganî waştişî bi ca bêrê. Waştişê înan waştişê merdimayî yê. Ganî her kes hemverê nê vengê xo berz bikero."

 

'Ma do giranî bidê serê xebatê dîplomasî'  

 

Gulere tewr peyîn vat, do giranî tewr zêde bidê serê xebatê dîplomasî û vat: "Xebatê ma seba pandemî vindertî. La demê ameyox de ma do  giranî bidê xebatê dîplomasî. Pêwa sazgehê dewlete ma do bi partî, baro, roşnvîr û nuştoxan dir bêrê têhet. Têkoşînê dayîkan do seba aştî dewam bikero."

 

'Gama yewine azadî, wedaritişê tecrîdî yo' 

 

Emîne Elbek zî vat, heta Rayberê PKKyî Abdullah Ocalan azad nêbo, tu Kurd nêeşkeno azad bibo û gama yewine azadî, wedaritişê tecrîdî yo û wina dewam kerd: "Wa bomba sey varanî serê ma de nêvarê. Ma nêwazenê gonîya kurdan birijîyo û wa aştî bêro."

 

'Dewlete huqûqî xo binpay kerd'

 

Bedîa Gokuz zî wina vat: “Gelo do no heta ça şêro? Dewlete huqûqê xo binpay kerda. Eke huqûq bibo her kes esto. Sena na rewşe reyna nêbo, ganî ma heme reaksîyon ramojnê. Ganî ma bi hîsgêr têbigeyrê. Eke ma veng vejê, do tecrîd peynî bibo. 1ê êlule de zî Tirkîya hêrişê xo dewam kerd. Gelo çi karê Tirkîya Şengal de esto. Nêweşxane bomba kerdî. Gelo şima çi nê merdiman ra wazenê. Ma dayîkî her wext aştî de israr bikerê. Ma do têkoşînkerdiş de bi israr bê."

 

Emîne Unal zî seba wedaritişê tecrîdî veng da heme kesî ke her kes paştdayîş bido û do têkoşînê xo dewam bikerê.