AMED - Taxê Dîcle û Ferîtkoşk ke girêdayeyê Fîskayî yê qezaya Yenîşehîrî Amedî yê, sey taxê bi rîsk ameyî îlankerdiş û dimayê nê, qerarê rijnayîşî ame dayîş. Roniştoxê taxe dîyar kerdî ke wazenê kultur û xozaya înan talan bikerê û vatî, do vera rijnayîşî peyser game nêerzê.

 

Bi îmzayê Serekomarê AKPyî Recep Tayyîp Erdoganî 18ê Tebaxa 2017 de taxa Fîskayê ya Yenîşehîrê Amedî sey wareyê bi rîsk îlan kerdibi. Bi plansazîyê ‘vurnayîşê bajarî' dir taxa Ferîtkoşk û Dîcle ke Fîskaya de yê, reyna rojeve de cayê xo girewtî. Roniştoxê taxe pêwa baxçeyê ameyê awankerdiş de ciwîyenê dîyar kenê ke bi serran o  cuyêka hempar dewam kenê.

 

'Do xoza û kultur bêrê texrîbkerdiş' 

 

Ame vatiş ke do taxê ke hetê TOKÎ ra awanî bêrê viraştiş. Hacer Varan bi  serran o Fîskaya de ya, vat cayê ke manenê bi xoza û kulturê xo cayêk cîya yo û bi awanîyê ke bêrê viraştiş do kultur û xoza xira bibo.  Hacere wina vat: “Ez na taxe de ameya dinya. Ciwanîya mi tîya derbaz bî. Ma her çîyê xo tîya ciwîyayî. Do awanîyê ke bêrê viraştiş her çî bivuryo. Do kultur û xoza ma bêro texrîbkerdiş.”

 

'Dewlete reyna ma koçber kena'

 

Hatun Gulen zî wina vat: “Dewlete seba ke ma keyeyê ma ra vejo, ma xapênena. Dewlete verê ma cayê ma ra kerd, dewa ma, keyeyê ma veşna. Ma mecbûr mendî ke koç bikerê. Pêwa hende feqîrî ma tîya keye viraşt. Nika wazenê ma reyke bîn koçber bibê. Nika zî seba ma keye ra vejîyê, pere pêşnîyaz kenê. Bi pereyê ke ey danê ne keye pê yeno girewtiş, ne zî ma eşkenê teqsîtêk keye bidê. Ma merdimê feqîr ê. Ez tena ciwîyena. Dewlete wazena xoza û çemê Dîcle seba  berjewendîyê xo bi xebitna. Wa dewlete destê xo serê cuya ma ra wedarno. Ez keyeyê xo ra nêvejêna."

 

'Dewlete bi nê keyeyan wazena cêbê xo pirr bikero' 

 

Hatun Yayik zî vat, 45 serrî yo Fîskaya de ciwîyena û vat: "Dewlete  wazena tîya xira bikero û vîlayan virazno. Dewlete keyeyê ke viraznena zî hewl dana ke ma rê biroşo. Dewlete seba berjewendîyê xo tîya keyeyan viraznena. Şar feqîr o. Ma tena eşkenê tîya debara xo bikerê. Ma nêeşkenê teqsîdan bidê. Ez û tûtê xo nêwazenê tîya birijyo. Ma cayê xo ra kêfweş ê."

 

'Dewlete hewl dana ke heqê ma destê ma ra bigîro' 

 

Eymene Aslan zî 50 serrî yo taxe de ciwîyena wina vat: "Wa keyeyê ma nêrê rijnayîş. Merkez de keyeyî zaf vay ê. Îmkanê ma çin ê. Dewlete bi zor zî ma vejo ma nêvejênê. Pêwa  tapoyê ma estê, wazenê ke ma vejê. Vîlayê ke dewlete viraznena, zaf vay roşena. Ma bi tu hawa belgeyan îmza nêkenê."

 

'Wa dewlete hizûrê ma xira nêkero' 

 

Belkisa Vural zî wina vat: “Ez û di kênayê xo tîya ciwîyenê. Ma cayê xo ra kêfweş ê. Ez tîya rê musaya. Gelo ma do merkez de senîn debara xo bikerê. Ma tîya rehet ê û bi hizûr ê. Wa dewlete hizûrê ma xira nêkero."

 

Hanim Can zî wina vat: "Ma nêwazenê keyeyê ma bêrê rijnayîş. Ez nêeşkena merkez de debara xo bikerî. Ez tîya kêfweş a. Dewlete çira cayê ma rijnena. Sebeb çîyo?  Vejêna xeberan û vana, do hende pere bêro dayîş. Hewl danê ke ma bixapênê û Fîskaya xira bikerê. Wazenê ma vila bikerê. Ma keyeyê xo nêdanê."