Sema Çaglak

 

AMED - KASED ke seba cinî û tûtan do perwerdeyê kultur û hunerî bido, 5ê êlule de bi merasîmêk xebatê xo danê destpêkerdiş. Mamosteya KASEDî Neşe Toprak dîyar kerd ke no sazgeh, sazgehê cinî û tûtan o û vat: "Berê sazgehê ma heme cinî û tûtan rê akerde yo. Ma bi hêvîyê ke xeylêk kesî beşdarê merasîmê ma yê akerdişî bibê."

 

Komeleya Kultur û Huner û Edîbîyatî yê Cinîyan (KASED), bi sloganê “Bi muhtewayêk pirrî dersê hunerî ser o xizmetê cinî û tûtê hunerheskerdoxan de yo” 2020 de dest bi xebatê xo kerdibi. KASED ke bi amancê hetê kultur û hunerî de xo biresnê cinî û tûtan ame akerdiş, seba prosesê pandemî perwerdeyîyê xo dabi vindernayîş. KASEDî nika zî do dest bi perwerdeyîyê xo bikerê û bi nê minasebetî 5ê êlule de do seba destpêkê xebatan bernameyêk virazno. Bername do bînaya KASEDî, saete18:00ine de bêro kerdiş. Derheqê babete de Mamosteya resimî ya KASEDî Neşe Toprak qisey kerd.

 

'Seba cinî û tûtan xebityenê' 

 

Neşeye destpêkê qiseykerdişê xo qalê xebatê xo yê dimayê tayînkerdişê qeyûmî kerd û vat: "Vernîya qeyûmî de sazgehê ma bî. Sey Cigerxwîn û Aram Tîgranî de ma perwerdeyîyê kultur û hunerî dayîne. Dimayê ke qeyûm ame tayînkerdiş, cayê ma yê hunerî zî ameyî padayîş. Labelê ma nêwaşt xebatê xo nimcet verdê. Bi no hawa sazgehê alternatîf akerd û xebatê xo reyna dewam kerdî. Çend serrî ma wina xebatê xo da dewamkerdiş la dima ra ma waşt ke sazgehêk bi taybetî seba cinîyan bibo û ma KASED akerd. KASED, xebatê xo seba cinî û tûtan ê hetê hunerî de keno. Dimayê ke ma cayê xo girewt û tadîlat û amadekarîyê xo qedêna, prosesê pandemî dest pêkerd. Coka ma mecbûr mendî ke perwredeyê xo bidê vindarnayîş."

 

'5ê Êlule de ma do xebatê xo bidê destpêkerdiş' 

 

Neşe tewr peyîn wina vat: "Seba pandemî ma perwredeyê xo dabi vindarnayîş. Seba ke ma newe ra destpê bikerê, bi konserêk ma do  pêşwazî bikerê. Seba bernameyê amadekarîyê ma dewam keno. Konser de do “Jin Ma” ca bigîrê. Ez omid kena ke xeylêk baş derbaz bibo. Ma wazenê pêro cinî û tûtî bêrê sazgehê ma û rastîzî ma bi kelecan ê. Dimayê bernameyî ma do dest bi perwerdeyê xo zî bikerê û coş bi coş dewam bikerê. No sazgeh, sazgehê cinîyan û tûtan o. Berê sazgehê ma heme cinî û tûtan rê akerde yo. 5ê êlule de zî ma wazenê bêrê tîya û ma dir bê. Ma pabeyê heme kesan ê."