AMED - 1ê Êlule Roja Aştîye ya Dinya Amed de do 4ê êlule de Meydanê Îstasyonî de bêro pêşwazîkerdiş. Platformê Ked û Demokrasîye ya Amedî Emîne Akşahîn bi sloganê, "Nika demê qîrayîşê aştîye yo" vengdayîşê tewrbîyayîşî kerd.

 

Amed de Roja Aştîye ya Dinya do emsar 4ê çlule de bêro pêşwazîkerdiş û amadekarî dewam kenê. Mîtîng do Meydanê Îstasyonî de bêro kerdiş. Mîtîng hetê Hêzê Ked û Demokrasîye Amedî ra yeno organîzekerdiş. Emsar bi sloganê "Nika demê qîrayîşê aştîye yo" organîsazyon yeno kerdiş. Sereka Şubeyê Hûmara 1 ê Egîtîm Senî yê Amedî ya Platformê Ked û Demokrasî, Emîne Akşahîn bale ant ser girîngîyê 1ê Êlule Roja Aştîye ya Dinya û vengdayîşê tewrbîyayîşî kerd.

 

'Ma do aştî biqîrê'

 

Emîne destpêkê qiseykerdişê xo bale ant serê rewşa Tirkîya û vat: "Kaos bi aştî eşkeno peynî bo. Modernîteyê kapîtalîst ke yeno ferzkerdiş taktîkê şerî yo. Sewbîna şer de tewr zêde cinî hedef yenê girewtiş. La cinî hemverê nê têkoşînêk pîl de yê. Cinîyan bi israr fek têkoşînî ra vera nêdayî. Ma benê şahidê têkoşînê hempar ê cinîyan ke Efxanîstan de yeno ciwîyayîş. Coka zî berpirsyarîyêk pîl keweno serê milê hêzê ked û demokrasî. Ma wazenê aştî biqîrê. Hemverê şerî hîna zêde biqîrê."

 

'Ganî muzakere û dîyalogî bêrê kerdiş' 

 

Emîne dewam de wina vat: "Çi heyf şerêke bi serran o nê welatî de esto. Butçe ganî şar û ciwîyayîşî rê bêro xerckerdiş la şerî rê yena xerckerdiş. Pereyê şarî sermayedar û şerî rê yeno pêşkêşkerdiş. Seba ke peynîya nê çîyan bêro ganî aştî bibo. Ganî muzakere û diyalogî bêrê kerdiş."

 

Vengdayîşê seba mîtîngî 

 

Emîne tewr peyîn seba aştîye veng da û wina vengdayîşê tewrbîyayîşê mîtîngê Amedî kerd: “Emsar Roja Aştîye ya Dinya hîn zêde girîng a. Ma do hemverê şerî 4ê êlule roja şeme Meydanê Îstasyonî de bê. Ma veng danê ke her kes a roje bi vengêke gur aştî biqîro."