Sema Çaglak - Gulîstan Azak

 

AMED - Cinîyê Amedijî veng dayî  welatijan ke 4ê Êlule de tewrê mîtîngê “Nika demê qîrayîşê aştîye yo" bibê. Cinîyan da zanayîş ke hemverê şerî do meydanan de aştî biqîrê. 

 

1ê Êlule Roja Aştîye ya Dinya emsar Amed de do 4ê êlule de, Meydanê Îstasyonî de bêro pêşwazîkerdiş. Mîtîng hetê Hêzê Ked û Demokrasîye yê Amedî ra bi sloganê, “Nika demê qîrayîşê aştîye yo" bêro organîzekerdiş. Cinîyê  Amedijî vernîya mîtîngî de vengdayîşê tewrbîyayîşê mîtîngî kerdî.

 

'Hemverê şerî ma do meydanan de bê'

 

Ayhan Ateş: Caardişê aştîye de tewr zêde cinî rolêk girîng gêno. Sey ma zanê verê ra heta ewro mabêne di hetî de şer yan zî pêrodayîşêk ameyîna kerdiş, melhefê xo yê sipeyî eştêne erd ke şer vindero. Yê ke tewr zêde seba aştî têkoşîn kenê cinî û dayîk ê. Seba ke tewr zêde zulm vînena ya û tewr zêde cinî dej ancena. Êdî seba înan bes o. Seba ke ma vajê bes û helwestê xo ramojnê, ganî ma heme roja mîtîngî meydanan de bê û seba waştişê aştî biqîrê."

 

'Ganî ma yewbînan ra fam bikerê...'

 

Mîne Karakaş zî wina qal kerd: "Rojhelato Mîyanên prosesêko xidar de derbaz beno, tewr zêde lazimîyê înan aştî rê esto. Sewbîna nê serê peyînan de hereme û hem zî mîyanê sînorê Tirkîya de xeylêk cinî  rastî hêrîş û şîdetî yenê. Sebebê nê serebûtan zî çi heyf seba çinbîyayîşê aştîye yo. Wexto ke ma mîyanê xo de aştî biciwîyê, hende cinî do nêrê kiştiş. Seba ke ma aştî mîyanê xo de awan bikerê, lazimîyê ma bi diyalogî esto. Heta ke ma yewbînan ra fam nêkerê, dejê yewbînan fam nêkerê ameyîşê aştî mimkun nîyo."

 

'Ma cuyêka têduşt û bi hizûr wazenê'

 

Şûkran Yakut zî vat na cografya de wina hemverê cinîyan de hêrişî bi hawayêke sistematik yenê kerdiş û vat: "Sebebê nê zî polîtîkayê şerî yê dewletan o. Şer de sere de cinî hedef yenê girewtiş. Ma nê çî Şengal de dî û Efxanîstan de ma vînenê. Coka bi taybetî seba aştî berpirsyarîyê ma yê cinîyan pîl o.  Ma wazenê şer xelas bo û aştîyêke mende temamê dinya de bi ca bêro. Hêvî û bawerîya ma aya ke cuyêka bi hizûr û têduşt seba pêro şaran bibo. 1ê Êlule Roja Aştîye ya Dinya seba pêro şaran pîroz kena.”

 

'Cayê ke ci de tena şer bibo cuye yena çinkerdiş'

 

Endama Meclîsê Partîya Demokratîke ya Şaran (HDP) Halîde Turkoglu zî wina vat: "Cayê ke ci de şer bibo; cinî çin yenê hesibnayîş, xoza yena rijnayîş, kurdî çin yenê hesibnayîş û cuye yena çinkerdiş.  Coka aştî yena manaya cuyêka têduşt. Ma serê cografyayêke tewr zêde lazimî bi aştî esta ciwîyenê.  Gama ke bîyayîşê cinîyan ame qebulkerdiş, o wext cuyêka azad û bi hizûr bêro awankerdiş. Seba caardişê aştî zî ganî ma pêro cîyabîyayîşan qebûl bikerê û xeleka hembeş de bêrê têhet."