Melîke Aydin

 

ÎZMÎR - Welatijê ke seba mudaxalekerdişê şewatê ke di hewteyo Dêrsim de dewam keno veng dayî û vatî: "Eke nêverdenê şarê ma bikewo daristanan o wext qetî bi zanebîyayîş nê şewatî vetê."

 

Qezaya Hozatê Dêrsimî de dewa Tanzî û mezra Koçerî ê dewa Kurukaymakî 17ê Tebaxe de wextê operasyonê leşkerî de şewat amebi vetiş û ver bi Uzunmeşe ê Xozat û PilImûrî de şi. Ame vatiş ke herêma Firtina Velî Çeşmesî, Çemê Roj ê Gelîya Pilemûrî de şewat dewam keno û Geliye Perîjî seba wareyî û zinaran mudaxelekerdişê bejahî mimkun nîyo. Yayladereyê Çewlîkî de zî şewat dewam keno û mudaxale nêameyo kerdiş û ame zanayîş ke adir ver bi xocîbîyayîşî de nêzdî beno.

 

Dêrsim de di hewte yo şewat dewam keno. Derheqê şewatî de  rayaumumî serê çapemenîya komelî de reaksîyonê xo ramojna. Hîn welatijan dîyar kerd ke xeberê şewatî çin ê û hîn kesan reaksîyon vera nê bêtêduştî dayî. Welatijan dîyar kerd ke ganî mudaxale şewatî rê bêro kerdiş.

 

Şewat de zî bêtêduştî kenê

 

Nermîn Sevîm şîrketêk taybetî de berpirsîyara muhasebeyî ye wina vat: "Şewat bi tena sereyê xo sosretî yo. Babetêka wina de zî bêtêduştî babeta vatişî ya. Şewat tewr zêde ame rojeve. Ganî bala ma hemine biancê ke uca de şîrketê madenî zemînê projeyê xo amade kenê."

 

'Ma nêzanê kamî ra bawer bikerê'

 

Karkera keyeyî Serap Ulger: “Qelsîyê dewlete esto. Goreyê mi min şewat bi qestî yeno kerdiş. Ganî ma na rewşe ra vajê êdî bes o. Wina derbaz nêbeno. Ganî dewlete bi hîsgêr têbigeyro. Eke dewlete hîsgêr têbigeyrayîne na rewşe nêameyîne ciwîyayîş. Ma nêzanê kamî ra bawer bikerê.”

 

'Gelo daristanî wina asan benê pîl?'

 

Welatîyêke nêwaşt nameyê xo bido zî wina qisey kerd: “Mudaxaleyê adirî nêkerdî. Her ca de adir vila beno. Ma nêzanê gelo qestî yeno kerdiş. Daristanêke wina asan nêbeno pîl. Ganî wa mudaxele bikerê. 15 rojî yo no şewat dewam keno. Seba hîna zêde nêveşo, vernî bêro girewtiş."

 

'Şarê ma nêgînê daristan bi qestî kenê' 

 

Kedkara keyeyî Umran Şen zî wina vat: “Şewatê Dersimî ra zanayîşê mi çinbi. Bi rastî mi nêeşnawit. Goreyê mi şewatî bi qestî yenê destpêkerdiş. Dewlete zî çîyêk nêkena. Şarê ma nêgînê daristanan o wext bi qestî û bi zanebîyayîş kenê. Ganî bi helîkopter û teyareyan  mudaxale bikerê. Ganî şarê ma zî şêro."

 

Kedkara keyeyî Semra Bîlge zî wina vat: "Çi heyf, mudaxaleyêk baş çin o. Ma zaf rehet têgêrenê. Mudaxale şewatî rê nîno kerdiş û goreyê mi nê de çîyêk esto. Ganî ma tewr zêde ser de vinderê. Daristanê ma cayê tewr weş ê. Ma înan zî vînî bikerê do her ca bibo çol."