Rojda Aydin

 

ŞIRNEX - Cinîyê sîyasetmedarî derheqê hêrişê serê Şengalî de qisey kerdî û vatî: "Komelê Êzidî ke 74 ferman ciwîyayê fek herra xo ra vera nêdayê. Xo rêxistin kerdê, wareyê xo pawitê û serbikewtê. La  Tirkîya ewro reyke bîn hêrişê Şengalî kena. Ma destûr nêdanê fermanêk newe."

 

16ê tebaxe de teyareyê Tirkîya bomba merkezê Şengalî de Sûka Kanî de varnayî û netîceyê hêrişî de fermandarê YBŞyî Seîd Hesen, birazayê ci şerwanê Yewîneyê Xoverdayîşê Şengalî (YBŞ) Îsa Xwedêda dinyaya xo bedilnabî û 3 kes zî birîndar bîbî. 17ê tebaxe de zî teyareyê şerî yê Tirkîya bomba serê ocaxa weşîye ya dewa Sikêni de varna û hêriş de zî 4 xebatkarê weşîye û 4 şerwanê YBŞyî dinyaya xo bedilnabî.

 

Cinîyê sîyasetmedarî derheqê hêrişê serê Şengalî de qisey kerd.

 

'Êzidî fek herre û welatê xo ra vera nêdanê'

 

Hemsereka HDPyî ya qezeya Silopî Zozan Aşkin, dîyar kerd ke îqtîdarê  AKP hemverê şarê Kurdî de bi serran o hêriş û qirkerdiş keno û vat: "Erdogan roja ke ameyo serê îqtîdarî, çar parçeyê Kurdistanî de hêriş kurdan keno. Seba nê zî ma hêrişê ke ewro hemverê Şengalî de yenê kerdiş, şermezar kenê. Komelê Êzidî, Şengal de 74 fermanan ra derbaz bî. Wextê fermanê 74ine bi hezaran êzidî ameyî qetilkerdiş û cinîyê êzidî hetê  DAÎŞî ra ameyî remnayîş. Cinîyê êzîdî bazaran de ameyî rotiş û ewro hema aqûbetê bi hezaran cinîyê êzîdî zî dîyar nîyo. Şarê Kurdî û kurdê êzîdî bi hêriş û qirkerdişan xelas nêbî û nêbenê. Amancê îqtîdarî oyo ke Şengal îşxal bikero û komelê Êzîdî wareyê înan ra koçber bikero. La no komel fek herre û welatê xo ra vera nêdano."

 

'Ma destûr nêdanê ke serê êzidîyan de fermano 75ine bêro kerdiş'

 

Zozane dewam de wina vat: "Îqtîdar wazeno cinîyan çin bikero û kole bikero. La cinî hemverê hêrişan wareyan de yo û xo ver danê. Cinî ewro hemverê hêrişan bîyê mertal û wareyan de şer kenê. Îrade, bîyayîş û hêzê cinî tu wext vînî nêbo. Ganî kes hemverê hêrişan bêveng nêmanê. Hemverê şerê Şengalî de zî ganî bêveng nêmanê û wurzê serê lingan. Ma bêvengî qebûl nêkenê û nêverdenê serê êzidiyan de fermanê 75ine bêro wedaritiş."

 

'Xoverdayîşê Komelê Êzidî bi ser kewt' 

 

Vervatoxa Meclîsê Cinîyan ê HDPyî qezaya Silopî Fehîme Saruhan zî şermezar kerd û vat: "Fermano peyîn de 5 hezar êzîdî ameyî qetilkerdiş û 10 hezar êzîdî zî destê DAÎŞî de esîr ameyî girewtiş. Nika zî bi hezaran cinîyê êzîdî tu zanayîş înan ra nîno girewtiş û ma nêzanê ke ça de yê. La PDK ke pêşmerge uca ra ant vînîkerd û xoverdayîşê Komelê Êzidî serbikewt.”

 

'Ma wayîrê Şengalî vejîyê'

 

Fehîme tewr peyîn vat: "Komelê Êzidî hemverê heme fermanan zî fek kulturê xo ra vera nêdayê. Êzidiyan kulturê xo pawit o û hemverê hende hêrişî fek vera nêdayê. Na zî kedêke pîl a. Tu wext bawerîya xo ra fek vera nêdayê. Ganî ma wayîrê Şengalî û êzidiyan vejîyê."