Sema Çaglak 

 

AMED - Endamê Dayîkê Aştîye yê Amedî bi minasebetê 1ê Êlule vengdayîşê aştîye kerdî û vat: "Herra Rojhelatê Mîyanên bi gonî yena awdayîş û qet veng nêdanê waştişê aştîye. La ma dayîkê kurdî, têkoşînê xo yê serê na cografya de û seba peynîkerdişê tecrîdê hemverê Abdullah Ocalanî de meydanan de bê."

 

1Êlule Roja Aştîye ya Dinya ya. Tewr zêde kurdî sîyaseto ke yeno kerdiş ra tesîr bî. Dayîkê kurdî, bi serran o; Rojawan, Başûr, Vakur û Rojhelat de seba şer biqedîyo û aştî bi ca bêro, mîyanê tevgerî de bî. Endamê Dayîkê Aştîye yê Amedî bi minasebetê 1ê Êlule Roja Aştîye ya Dinya ajansê ma rê qisey kerdî.

 

'Goş medê waştişê ma yê aştîye' 

 

Endama Dayîka Aştîye Nafiye Yîgît dîyar kerd ke bi serran o serê nameyê Dayîkê Aştîye de vengdayîşê aştîye kenê û vat: "Vengdayîşê ke ma seba aştî kenê, çi heyf nîno eşnawitiş. Dayîkî her wext aştî wazenê û tu wext cîyayî nêkenê. Tena seba pêro şaran aştî wazenê. Ma bi serran o hem seba kurdan hem zî seba tirkan vengdayîşê aştî kenê. La ma yenê destbendkerdiş û tepiştiş. Seba aştî bi ca bêro, ma muracatê her cayî kerd. Ma kuçeyan de waştişê xo ard ziwan. Wext ame ma Enqere de çadirî dayî ro, laçikê xo eşrî erd. Seba ke şer vindero. La dewlete goş nêda waştişê ma yê aştî. Semedo ke seba berjewendîyê xo şer wazenê."

 

'Kilîtê aştîye Îmrali de yo' 

 

Afîfe Kartal dîyar kerd ke nika hemverê Rayberê PKKyî Abdullah Ocalanî de tecrîdêk esto û vat: "Kilîtê aştîye Îmraliyî de yo. Ma çiqas vajê aştî û yewbîyayîş, ê vanê kiştiş û şer. La ma do heta peynî vajê aştî û azadî. Ma wazenê êdî no tecrîd wurzo. Aştîyêke bêro nê welatî. Hem tecrîdê serê Ocalanî hem zî tecrîdê serê nê şarî wa peynî bibo. Rewşa tepişteyan xeylêk xirab a. Ma keye seba rewşa înan mîyanê endîşeyî de yê. Ma êdî çareserî wazenê. Êdî nêwazenê tu kes bêro kiştiş."

 

'Seba şerî ney seba aştîye bikewê meydanan' 

 

Tewr peyîn zî Sultan Altan qisey kerd û dîyar kerd ke bi 20 serrî yo seba aştîye kuçeyan de têkoşîn kenê û vat: "Ma sey her serre zî bi minasebetê 1ê Êlule vengdayîşê xo yê aştî reyna kenê. Rojhelato Mîyanên aştîye rê teyşan o. Ma key seba aştî destê xo derg kenê, ê bi şer cewabê ma danê. Seba waştişê ma yê aştî zî teda û zordarî serê ma de kenê. Ma seba şerî ney, seba aştî vejîyê meydanan. Ma nêwazenê tu kes bimiro, dayîkî hêsran bivarnê. Bes o êdî kezeba dayîkan nêmende! Kam beno wa bibo ganî seba şerî nimiro. Ma wazenê waştişê ma yê aştîye bi ca bêro. Tewr zêde dayîkî aştî wazenê. Ez veng dana ke ganî her kes seba aştî têkoşîn bikero."