Gulîstan Azak

 

AMED - Wendekara unîversîteya Munzurî Gulîstan Doku 600 rojî yo zanayîş ci ra nîno girewtiş. Avûkate aye, Alî Çîmen vat dimayê feshkerdişê Pêkerdişê Stenbolî cipersayîş ameyo vindarnayîş. Komeleya Cinîyan a Rosa Elîf Tîrenç Ulaş zî vat, seba cipersayîşêk bi tesîr nêame kerdiş û vînîbîyayîş sey întîxar ame ramojnayîş, Gulîstan nîna vînayîş.

 

Wendekara Unîversîteya Munzurî Gulîstan Doku Dêrsim de 5ê Çeleyî 2020 de vînî bî û a roje ra dima zanayîş ci ra nêame girewtiş. Berpirsîyarê serebûtî Zaînal Abarakov û bamarîyê ey  polîs Engîn Y. hema nêameyê tepiştiş û derheqê înan de tu qerarêk nêameyo girewtiş.

 

Nêzdîyê serrêke Gola Awbendê Uzunçayirî de Gulîstane geyrayî û bi israr vatî întîxar kerda. Heme muracatê keyeyî bê cewab mendî. Yê ke persa ‘Gulîstan Doku ça de ya?’ kerdî zî tehqîqat derheqê înan de ame destpêkerdiş. Zaînal Abarakov ke tewr peyîn ey Gulîstane dî û keyeyê ey bi hawayêke eşkera ameyî pawitiş. Zaînal verê çiman de vejîya teberê welatî û waya Gulîstane, Aygul Doku rê dewa amî akerdiş, cezaya pereyî ci rê ameye birnayîş.

 

Cinîyê ke semedê vînayîşê Gulîstane têkoşînêk pîl dayî, sere de Dêrsim de û xeylêk bajaran de persa ‘Gulîstan Doku ça de ya?’ kenê. 

Avûkatê Gulîstane Alî Çîmen û Komeleya Cinîyan a Rosayî, Elîf Tîrenç Îpek Ulaş derheqê babete de ajansê ma rê ercnayîş kerdî.

 

‘Cipersayîş ame vindarnayîş’

 

Avûkat Alî Çîmen vat, pêwa 600 rojî yo Gulîstane nêameya vînayîş zî hema kar û barê dosya nêameyê kerdiş û vat: “Cipersayîş zî dimayê feshkerdişê Pêkerdişê Stenbolî ame vindarnayîş. Dosya de serê materyalê biguman de hema cigêrayîşêk hîra nêameyo kerdiş. Reyna serê kamerayê asayîşî ke tewr peyîn Gulîstane pê ameya vînayîş, tu cigêrayîş nêameyo kerdiş. Raporê keso zana yê fermî nêameyo girewtiş. Bi pêroyî ez eşkena vajî ke cigêrayîşê derheqê Gulîstane de bi tesîr nêame kerdiş û nîno kerdiş. Keyeyê Gulîstane seba sozê ke ameyê dayîş hema bi hêvî yê. La çi heyf nê vatişî hema tesîr serê kar û barê cipersayîşî de nêkerdo.”

 

Vengdayîşê paştdayîşî 

 

Alî tewr peyîn wina vat: “Sere de ma huqûqnas û rêxistinê heqê merdiman, seba vînîkerdişê cinîyêke ciwan a 21 serrî bêro roşnkerdiş, sûc û sûcdarî bêrê tespîtkerdiş, wayîrê berpirsyarîyêk pîl ê. Ez veng dana rayaumumî ke wa persa ‘Gulîstan Doku ça de ya’ bikerê û bi keyeyê Gulîstane dir bikewê paştdayîş.”

 

‘Serebût munferît nîyo’ 

 

Elîf Tîrenç Îpek Ulaş zî vat serebûtê Gulîstan Doku munferît nîyo û vat: “Cipersayîş baş nêame kerdiş. Tirkîya ke hêzê asayîşê dewlete ya bi sehezaran a û yek serebûtêk qij zî bi kamerayan yeno tespîtkerdiş, bi 600 rojî yo cinîyêke nîna vînayîş. Wexto ke rewşe wina bo, bêguman yeno hişê merdiman ke gumanbar yenê pawitiş. Serebût sey întîxar ame ramojnayîş û no zî sebebo tewr pîl nêvînayîşê Gulîstane yo. Pêwa bajar bi kamerayan yeno taqîbkerdiş zî Gulîstane nêamî vînayîş. Rewşa gumanbar Zaînal Abakarovî baş nêame cigêrayîş û delîlî zî vînî bî. Waya Gulîstane ke têkoşînê edeletî dana cipersayîş ame kerdiş. Akvîtîstê ke aqûbetê Gulîstane perd kerdî cipersayîş ame akerdiş. La ma komeleyê cinîyan vanê ke ma fek nê serebûtî ra vera nêdanê.”