RIHA - Emîne û Ferît şenyaşar yê ke çalakîya înan ya nobete roja 170ine de dewam kena, dîyar kerdî ke ê bi saetan seba ke bi dozgerî dir pêvînayîş bikerê pabeyê ci mendê la dozgerî bi înan dir pêvînayîş nêkerdo.

 

Çalakîya nobeta “Edaletî” ya keyeyê Şenyaşarî roja 170ine de dewam kena. Keye, seba pêvînayîşê telefonî yê hewteyî bi yê Fadil Şenyaşarî dir 3 serrî yo Zîndanê Xarpetî de hucreyê yew kesî de yeno tepiştiş, erey ame verê awanîya edlîye. 

 

‘Dewa nêameye akerdiş’

 

Ferîtî ard vîr ke Wekîla AKPyî ya Mêrsînî Zeynep Gul Yilmaz seba ke heqaret polîsêk rê kerd, reaksîyon vera nê virazya û wina vat: “La parlamenterêkê AKPyî, Nêweşxaneyê Dewlete ya Pirsûsî de eynî keye ra 3 kesî qetil kerdî, bi 3 serrî yo dewa zî nêameya akerdiş. Zulmêk esto, ganî heme Tirkîya wayîrê na dewa vejîya. Kesê ke sûcê merdimayî kerdî, do cezaya xo biancê. Ma nê zulmî qebûl nêkenê. No zulm ganî peynî bikerê.”