MÊRDÎN - Hecî Fincik Bozkurta 95 serrî bi tût û tornanê xo ramitiş kena.  Seba keyeyî çîyo tewr girîng keda ke serê herra xo de yena dayîş a. Hecî Fincik, dîyar kerd ke şew û roje xebityenê û vat: “Ewro ma vînenê ke keda cinîyan sey karêko şenik yena vînayîş. Ganî vatişê cinî û cayê cinî mîyanê komelî de qij nêro vistiş.”

 

Hecî Fincik Bozkurt ke 95 serrîya dewa Deyşana girêdayê qezaya Şemrexî ra ya, her tim bi karê ramitişî dir eleqedar bîya û nika zî pêwa emrê xo yê pîlî bi tût û tornê xo dir karê ramitişî kena.

 

‘Nika cinî sey verê xebityenê’ 

 

Hecî Fincik ma rê wina qalê rojê verê kena: “Ez hema tûte bîya mi nê karî kerdêne. Dimayê ke ez zewicyaya zî mi reyna eynî çî kerd. O wext feqîrî estbî û zêde çî çinbî. Ma zî tena semedê debara rojane karê ramitişî kerdêne. Belê karê ma tewr zehmet bi. Ma paletî kerdêne, ramitişî kerdêne, heywanan wey kerdêne, karê keyeyî kerdêne û tûtan wey kerdêne. Nika zî zêde ferq çin o. Reyna cinî hende kar kenê. Ferqê nika ra tena vejîyayîşê makîneyan o. Mi pêwa nê zor û zehmetiyan hes karê ramitişî kerdêne. Keye de kar nêqedîya û ma acîz bîne. La mîyanê zîyanî de ma pîya bî. Ma pîya sohbet kerdêne û ma kar kerdêne. Nika wexto ke ez yena tîya ê rojî yenê vîrê min û ez kêfweş bena.”

 

‘Her ke şino lazimîyê ma zêde benê’ 

 

Kênaya Hecî Fincik, Ayşe Bozkurt zî wina qal kerd: “Seke dayika mi zî vat, verê çinbîyayîş û feqîrî estbî. Labelê nika her ke çax aver şino, lazimîyê însanan zî zêde benê. Verê ma serê berê xo de bî. Ma arê dayêne û werdê ma o bi. Nika ma verî ra  hîna zaf girêdayeyê bacaran ê. Ma tewr zêde erdan ramenê. Pêwa nê ma tena eşkenê pîzeyê xo mird bikerê.”

 

‘Gereka ma zengînîya xo kifş bikerê’

 

Veyva Ayşe, Yeter Bozkurt wina vat: “Gereka ma zengînîya xo tewr baş bikerê. Herra ma zengîn a. Eke ma biwazê ma do tewr zêde bieşkê feyde bigîrê. Vera ke ma şêrê şaristanê xerîban de bixebityê, ma serê erdê xo de ramitiş bikerê û debara xo bikerê. No kulturê ma yê hezar serran o û nê karî ma do tewr baş bikerê. Ganî ma serê herra xo de bê û serê herra xo de debare bikerê.”