AMED -  Sîyasetmedarê cinî yê Amedî dîyar kerdî ke Efxanîstan de hemverê cinîyan trajedîyêk pîl esto. Fîlîz Buluttekîn dîyar kerd ke her tewir hêrişê hemverê cinîyan polîtîk o. Sereka CHPyî ya Amedî Gonul Ozel zî diyar kerd ke hemverê hêrişan ganî cinî bibê yew û wurzê serê lingan.

 

Dimayê qerarê antişî yê Amerîkayî vera  Efxanistanî, Talîbanî paytexto Kabul zî mîyan de heme bajarê welatî kerd binê kontrolê xo. Nika bi des hezaran efxanî hêrîşê heyfgirewtişî yê  Talîbanî ra bi endîşeyîn ê, welat de kaosêko pîl esto. Bêguman yê ke tewr zêde bi endîşeyê zî cinîyê efxanijê. Dimayê ke Talîban Kabîl de aver şi dima hukmatê efxanî welat terk kerd û leşkerê efxanî hemverê Talîbanî şer nêkerdî. Cinîyê efxanijî dîyar kerdî ke ê heqê xo teslîm nêkenê û vera nê têkoşîn kerdî û xo ver danê. Serê rewşa cinîyê efxanijan de siyasetmedarê cinîyê Amedî qisey kerdî.

 

‘Her tewir hêrişê hemverê cinîyan polîtîk o’

 

Hemşaredara Sûrî Fîlîz Buluttekîn ke wezîfe ra amebî girewtiş û qeyûm vera ci tayîn bi, diyar kerd ke Şengal de hêrişê DAIŞî yê hemverê êzîdijan ewro Efxanîstan de hetê Talîban ra yeno kerdiş û vat: “Dewletan, bi vatiş û nêzdîbîyayîşê xo kerdişan meşrû kenê û benê  şirîkê sûcê ke yenê kerdiş. Her tewir hêrişê hemverê cinîyan polîtîk o. Ma xeylêk rey dîyo ke şert û mercê şerî de vernê de cinî hedef yenê girewtiş. Tirkîya û welatê ke bi Talîban dir eynî zîhniyetî pare kenê, Talîbanî meşrû vînenê. Têkoşînê cinîyan ê azadî êdî resayo sewîyeyêka hêzê dinya. Coka tewr zêde cinî hedef yenê girewtiş. Seba ke vernîya têkoşînê cinîyan bigîrê zî dînî yenê xebitnayîş. Yeno waştiş ke cinîyan komelî ra dûr bifînê û seba şeran sey ganîmet xebitnenê.”

 

‘Nêzdîbîyayîşê hemverê cinîyê efxanijan nîno qebûlkerdiş’

 

Fîlîze dewam de wina vat: "Ewro Tirkîya de qetlîamê cinîyan her ke şino zêde beno. Sewbîna Pêkerdişê Stenbolî deskewtişê cinîyan ê tewr pîl ameyîne ercnayîş, ame wedaritiş. Nika ma vînenê ke ê zî wayîrê eynî hişmendî yê. Cinîyê efxanî hema zî xo ver danê û ma eşkenê vajê ke têkoşînê cinîyê kurdan ra  îlham gênê. Rojawan de şorişê cinîyan ame kerdiş. O şoriş verê heme çimê dinya de yo. Yanî têkoşînê cinîya kurde seba cinîyê dinya bena nimûne. Ma reyna vanê, ma nêzdîbîyayîşê hemverê cinîyê efxanijan de qebûl nêkenê û bi şîdet şermezar kenê. Ma do pêro cinîyê dinya dir têkoşîn û vatişê xo yê hempar vajê.”

 

‘Goş bidê vengê cinîyanê efxanijan’

 

Sereka CHPyî ya Amedî Gonul Ozel zî vat, Efxanîstan de asayîşê cuya cinîyan çin o û wina dewam kerd: “Hêrişê Talîbanî yê vera cinîyan, şibyeno hêrişê  DAIŞî. Cinîyê efxanijî pabeyê paştdayîşî yê û wazenê vengê xo bidê eşnawitiş. Ganî pêro sazgeh û rêxistinê cinîyan vengê paştdayîşê rê bibê yew veng.”

 

Gonule dîyar kerd ke Efxanîstan de cinî cayê komelî ra yenê dûrfistiş û vat: "Cinî perwerdeyî ra yenê dûrvistiş, kar ra yenê eştiş. Siyasetmedarê cinî wazenê tîya ra biremê. Rojnamegerê ûca zî yenê qetilkerdiş û ûca de kaos û trajedîyêk xeylêk pîl yeno ciwîyayîş. Ma wehşetê ûca vînenê û taqîb kenê. Cinîyê ke çarşefe nêdanê xo ra, kuçeyan de yenê qetilkerdiş.”