Oznur Deger 

 

ENQERE - Roniştoxê Enqereyî dîyar kerdî ke ganî selahîyetdarê dewlete vatişê xo yê nîjadperestî bivurnê û vat: "Gama ke pîlê  dewlete wina qisey bikerê, do komel zî wina nêzdîyê multecîyan bibê. Ganî ma neslê newe hemverê hêrişê nîjadî perwerde bikerê. Dinya qîmê her kesî kena. Ganî her kes têduşt biciwîyo." 

 

Vatişê nefretî yê îqtîdarî û siyasetmedaran, rayîr ver bi zêdebîyayîşê hêrişan keno û bi taybetî zî hemverê kurdan hêrişê nîjadperestî kenê. Welatiyê Enqereyî derheqê hêrişê nîjadî û rewşa multecîyan de qisey kerd.   

 

Dîlek Bulucular dîyar kerd ke vatişê nîjadî ganî qanûn ra bêrê vetiş û vat: "Ma vînenê ke mîyanê multecîyê Efxanîstanî de cinî û tûtî çin ê. Seba ke xeylêk cinî seba nêkewê destê Talîbanî peynîya cuya xo ardî. La camêrdî zî ameyê tîya. No çî mi zaf aciz keno."

 

'Nîjadperestî yeno averbîyayîş' 

 

Aynur Hatîpoglu zî wina vat: "Siyasetmedarî hemverê multecîyan çîyêk nêkenê. Ez hêrişê nîjadî zî şaş vînena. Tirkî zî welatê bîn de ciwîyenê.  Ganî bêtêduştî nêro kerdiş. Eke welat goreyê kapasîta xo multecîyan bigîro do hîn rehetî bibo. Nîjadperestî yeno averşîyayîş û ganî no çî nêro kerdiş."  

 

‘Wezîrî vajê çi ma do wina bikerê...'

 

Fatma Çamçioglu zî persê "Çira nîjadperestî yeno kerdiş?" û wina vat: "Kesê ke şer ra remenê û yenê welatê cîya de bi ca benê, beno ke ma zî ê multecîyan ra bîne. Oyo ke yeno kerdiş nîjadperestî yo û çîyêk şaş o. Ganî nêro kerdiş. Ez Kastamonu ra ameya. Tîya zî eynî çî esto. Parlamenter û wezîrê ma vajê çi ma do wina bikerê. Komel vatişê înan ra tesîr beno. Ganî ma îmkan bidê multecîyan zî."

 

'Ganî her kes şertê têduştî de biciwîyo'

 

Gunay Abbasli dîyar kerd medyaya dijîtale zî hêrişan de tesîr bî û vat: "Hêrişê nîjadî de medyaya dijîtale bi tesîr bî. Kesê ke medyaya dijîtale taqîb kenê, hemverê multecîyan bihukm ê. Multecîyan cîya vînenê. Gama ke pîlî dewlete wina qisey bikerê do komel zî wina nêzdî bibo. Coka ez eşkerayîya wezîfedaranê dewlete şermezar kena. Ganî ma neslê newe hemverê hêrişê nîjadî perwerde bikerê. Her kes merdim o û dinya qîmê her kesî kena. Ganî her kes têduşt biciwîyo."

 

'Ganî her kes bi wijdan bo'

 

Asli Tunç zî wina vat: "Multecî hem welatê xo hem welatê bînan de bi  heqeretan dir rî bi rî manenê. Ganî her kes bi wijdan bo. Ma nê qirkerdişan tena televîzyonan de 5 saniye vînenê. Ganî ma her tewir hetkarî bidê multecîyan û lazim o heme dewletî zî wina nêzdîyê multecîyan bibê."

 

 'Semedê rayan wina kenê'

 

Buşranur Onal zî vat ke hêrişê nîjadî zêde bîyê û vat:  "Îqtîdaro nika û serekwezîr seba rayan bigîrê welatbîyayîşê multecîyan qebûl keno."  Yasemîn Akillioglu Yeşîlkaya zî dîyar kerd ke hêrişê hemverê multecîyan bêrêzdarî yo û vat: "Tirkî zî xeylêk şaristanan de ciwîyenê û ganî ê zî rêzdar bê û her kesî ko bikerê."