Oznur Deger

 

MÊRSÎN - Şehrîban Çoban serrêke verê zîndan ra vejîya, semedê fikrê aye sîyasî hetê cîranê xo yê Murat K. ra bi hêrişî dir rî bi rî mende û bi merdiş amî tehdîtkerdiş. Dayîka Şehrîbane, Nafiye Çoban zî dîyar kerd ke mengêke verê hetê eynî kesî ra bi kerreyan hêrişî dir rî bi rî menda. Hêrişkar dimayê ke îfadeyê ci ame girewtiş, serbest ame veradayîş.

 

Her roja ke derbaz beno hêrişê nîjadî yê hemverê kurdan zêde benê. Sîyasetê ke hemverê kurdan de yeno kerdiş, rayîr ver bi hêrişê xidar akenê. Mîyanê mengêke de Konya, Enqere, Çorum, Antalya, Duzce û xeylêk bajarê Tirkîya de kurdî bi hêrişê nîjadî dir rî bi rî mendî. Tewr peyîn hêrişêk Mêrsîn de ame kerdiş. Taxa Halî ya qezeya Akdenîzê Mêrsîn de her hîrê wayî Şehrîban, Derya û Eylem bi eslê xo Bêdlîs ra yê, hetê cîranê xo Murat K. ra hêrişî dir rî bi rî mendî. Hêriş vizêr şan de saete 17.30 de ame kerdiş. Kesê ke bi hêrişî dir rî bi rî mendî, bi merdişî ameyî tehdîtkerdiş. 

 

Şehrîban Çoban bi bahaneyê "Endama rêxistinî ya" 5 serran Zîndanê Cinîyan ê Şakranî de mende û 26ê hezîrana 2020 de amî tehliyekerdiş. Şehrîbane hêrişê ke ame kerdiş ajansê ma rê qal kerd.

 

Şehrîbane dîyar kerd ke no hêriş vizêr ame kerdiş reya ewil nîyo û vat: "Nêzdîyê serrêke keye rastê hêrişî winasî yeno. Mengêke verê dayîka mi Nafiye bi hêrişê Murat K. ra rî bi rî mende. Murat bi kerra û daran hêrişê dayîka mi kerd. Gama ke hêriş kerdêne zî vatêne, 'Leşkerê mi estê, polîsê mi estêê û dewleta mi esta' Dimayê hêrişî, dayîka mi nêweş kewte û nika zî nêameya serê hemdê xo. Xeylêk çî nînê vîrê ci. Dimayê serebûtî mi dayîka xo keye ra dûr fîna. Sewbîna semedê nêbo şerêke pîl mîyanê keyeyan de ma derheqê hêrişî de gerre kerd. La dîyar bi ke no çî dewam bikero."

 

'Her wext mîyanê hewldayîşê provaktîf de bi' 

 

Şehrîbane, dîyar kerd ke 40 serrî yo bi hêrişkarî dir cîrantî kenê û vat: "Semedê fikrê sîyasî têkiliyê ma çin ê. La fikrê ma her tim ey rê problem bi. Demê peyîn de her tim vatêne, 'Şima terorist ê û ez o şima bikişî' la ma goş nêdayîne. Mi waşt ey dir qisey bikerî. Wayê mi Derya û Eyleme zî verê mi de bî. Seba hêriş bikero tim bahane vetêne. Tewr peyîn verê keyeyê m ara derbaz bi û heqaret bi ma kerd. Mi wayê xo kerdî zere. Dimayê demêk vat, 'çekê mi esto' û şi keye çekê xo bîyaro. Mi zî o wext telefonê polîsan kerd. Cinîya ey serê Muratî de ber pada. Çekê ey bi ruhsat estbi û birayê ey zî polîs o. Polîs û polîsê sivîl zî ameyî. Wexto polîsî ameyî hêrişkar reyna hewlda ke bikewo mîyanê keyeyî û verê çimê polîsan de waşt hêrişê ma bikero. Polîsan hêrişkar berd qereqole. Dimayê îfadeyê ci ame girewtiş Murat K. serbest ame veradayîş."

 

'Cuya ma asayîş de nîya' 

 

Şehrîbane, bale ant serê hêrişan û vat: "Bi taybetî 6 mengê peyîn de tewr zêde helwestêk ey hêrişî estbi.  Semedo ke birayê ey polîs o, ez bawer nêkena ke ceza bigîro. Pêwa ke ma ters û endîşeyê xo qerekole de vat zî la înan reyna çîyêk nêkerd. Tewr peyîn keyeyê şawit keyeyê ma ke ma fek îfade ra vera bidê. La ganî bêro zanayîş ke ez o heta peynî pey na babete debî. Cuya ma asayîş de nîya. Konya de zî eynî serebût bi la heta nika kesî hesab nêpersayo. Nêzdîbîyayîş û helwest nîjadî yo. Bawerîya hêrişkarî çekê ey ra yeno."