AMED - Endamê Meclîsê Dayîkê Aştîye yê Amedî reaksîyon vvera bêvengîya dinya ya hemverê hêrişê serê Şengalî de dayî û vatî: "Dinya vera hêrişê serê Şengalî de kor û ker bîya û eke ma hemverê hêrişan nêbê yew, ma do vînî bikerê."

 

16ê tebaxe de Arteşa Tirkî bi teyareyê şerî hêrişê serê Sûka Kan ê merkezê Şengalî û netîceyê hêrişî de Fermandarê YBŞ Seîd Hesen û Şervanê YBŞî Îsa Xwedêda dinyaya xo bedilnayî û 3 kesî zî birîndar bî. 17ê tebaxe de reyna Arteşa Tirkî bi teyareyê şerî hêrişî serê Nêweşxaneyê dewa Sikêniyî yê Şengalî kerd. Netîceyê hêrişî de 4 xebatkarê weşîye û 4 şervanê YBŞyî yê nêweş dinyaya xo bedilnayî û 4 kes zî birîndar bî. 

 

Pêwa reaksîyonî zî hukmatê Iraqî û yê Herêma Federal a Kurdistanî hemverê hêrişê ke ame kerdiş de bêveng ê. Derheqê babete de endamê Meclîsê Dayîkê Aştîye yê Amedî fikrê xo ajansê ma rê pare kerdî.

 

'Seba berjewendîyê xo bêveng manenê' 

 

Havva Kiran, qiseykerdişê xo de bale ant serê bêvengîya Barzanî û vat: "Sereyê ewîlî DAIŞî şawitî û tût û cinî ameyî remnayîş. Nika zî dewleta tirkî hêriş kena. Eke Barzanî destûr nêdo no çî nêbeno. Êzidî bi serran o seba ke serê lingan de bimanê têkoşîn kenê. Barzanî seba berjewendîyê xo hemverê hêrişê serê Şengal û Rojawan de bêveng maneno. Şengalo ke serê herra to de hetê Tirkîya ra yeno bombardumankerdiş û ti vanê, 'Ez kurd a' ma tûtê xo seba to nêardê dinya. Ti ma bi tûtanê ma tehdîd kenê. Ez tîya vengdayîşê yewbîyayîşî kena û eke ma nêbê yew ma do vînî bikerê."

 

'Temamê dinya hemverê Êzidîyan bêveng a' 

 

Kudret Eryilmaz zî wina vat: "Hemverê fermanê ke ameyê kerdiş de pawitişê heqê merdiman û taybetî zî pêro dinya bêveng a. Nêweşxaneyêk ame bombardumankerdiş û hema zî bêvengîyêk esto û huqûqî şerî de zî hêrişê hemverê nêweşxaneyan çin o. Ez veng dana pêro dinya, ez vana destê xo bidê serê wijdanê xo û paştdayîş bidê Şengal. Se bikerê wa bikerê nêeşkenê zorê êzidîyan berê, bi hêrişan dir tewr zêde êzidî wayîrê nasnameyê xo vejênê."

 

'Çira dinya vengê dayîkan nêeşnawena?'

 

Raîfe Ozbay vat, zulmo ke yeno kerdiş, tu cayê dinya de çin o û wina dewam kerd: "Ça de ameyo vînayîş ke nêweşxane ameyo bombardumankerdiş! Heqê tu kesî çin o ke Şengalî ser bombayan bivarno. Dinya çira vengê dayîkan nêeşnawena? Dinya çira kor û kerr a. Her çiqas destê ma nêreso înan zî zerrîya ma înan dir a. Ma reyke bîn dewleta tirkî şermezar kenê."