RIHA - Keyeyê Şenyaşarî 163 rojî yo çalakîya xo ya "Nobeta Edaletî" dewam kenê. Emîne Şenyaşar çalakî de vat: "Ma seba edaletî têkoşîn kenê û do rojêke no îqtidar zî şêro û do zulmkarî heme cezaya xo biancê."

 

Keyeyê Şenyaşarî roja 163ine de verê Edliyeyê Rihayî de “Nobeta Edaletî” dewam kerd. Keyeyî ewro bi Fadil Şenyaşar ke hîrê serrî yo tepişte yo, pêvînayîşê telefonî kerd.  

 

Ferît Şenşayar ke pêwa dayîka xo Emîne 163 rojî yo seba edaletî têkoşîn kenê û wina vat: "Têkoşînê ma yê edaletî 163 rojî yo binê zulmî de dewam keno. Hîrê merdimê ma nêweşxane de ameyî qetilkerdiş. Hîrê serrî yo derheqê dewa de tu averşîyayîşêk çin o. Kesêk zî nêameyo destbendkerdiş. Kiştoxî Pirsûs de serbest gêrenê. Polîs û serdozger zî wezîfeyê xo nêkenê û şirîkê sûcî yê. Birayê mi Fadil Şenyaşar hîrê serrî yo hucreyaê yew kesî de tepişnenê. Wa dadger û dozgerî wezîfeyê xo bikerê û huqûqê serdestan peynî bibo.”

 

Emîne Şenyaşar zî dîyar kerd ke ê seba edaletî têkoşîn kenê û do rojêke no îqtidar zî şêro û do zulmkarî heme cezayê xo biancê.

 

Keyeyî serê hesabê xo yê medyayê dîjîtalî de zî mesaj nuşt û waşt merdimayî hemverê nê dramî de bêveng nêmanê.