Sema Çaglak

 

AMED - Çarçewaya kampanyaya "Ma HDPyî yê, her ca de yê" şaristanan de bi şarî dir pêvînayîş yeno kerdiş. Aktîvîsta TJAyî Gulcîhan Şîmşek bale ant serê  kampanyaya û vat: "HDP xo bi rêxistin keno û pîl keno. Şar zî bi rêxistinbîyayîş helwestê xo pîl keno."

 

Partîya Demokratîke ya Şaran (HDP) dimayê kampanyaya “Seba her kesî edalet” dest bi kampanyaya “Ma HDPyî yê, her ca de yê" dayî destpêkerdiş. Çarçewaya kampanyaye de HDP herême û Tirkîya de pêvînayîş bi şarî dir keno. Derheqê babete de aktîvîsta Tevgerê Cinîyan ê Azadan (TJA) Gulcîhan Şîmşek ajansê ma rê qisey kerd.

 

'Ma HDPyî yê, ma her ca de yê'

 

Gulcîhane destpêkê qiseykeredişê xo de bale ant serê girîngîyê her di kampanyayê HDPyî û vat: "Hem kampanyaya, 'Seba her kesî edalet', hem zî kampanyaya 'Ma HDPyî yê, her ca de yê' seba komelî girîn bi. Ma bêedaletî, bêhuqûqî û krîzê ekonomî û sîyasî yê ke Tirkîya de yenê ciwîyayîş bi çimê şarî dî. Tirkîya sîstemê ke qîmet dana cuya însanan nîya. Ma cinî rayberîya nê kampanyayan kenê. Kampanyaya 'Ma HDPyî yê, her ca de yê' bi taybetî hemverê padayîşê dewaya HDPyî û hemverê teda û hêrişan zaf girîng bi."

 

'Xeylêk problemê ke bêrê çareserkerdiş estê'

 

Gulcîhane dewam de wina vat: "Çi heyf muxatabê waştişê şarî çin o. Ma cinîyî, pey çareserî de yê. Tewr peyîn qirkerdişê Konya de ame kerdiş, tersê şarî hîna zêde bi. Sewbîna hêrişê hemverê multecîyan zî êdî bi problemê komelê tirkî.  Nê kampanyanê ma rê lazimî esta. Nimûneyê tewr girîng ez eşkena Meletî ramojnî. Riha û Şirnex de cinî verê xo danê Meletî seba komkerdişê qeysiyan. La keda ke ê danê û pereyê ke gênê yewbînan nêgîno. Pereyê ke gênê qîmê rojêke nêkeno. Sewbîna tewr zêdê wendekarî tîya xebityenê. Seba ke wendekarî karêk înan bîn çin o û verê xo danê karkerîyê mewsîmî. No çî heqderîyê kampanyaya ma reyke bîn ramojneno."

 

'HDP rêxistinbîyayîşê xo pîl keno'

 

Gulcîhane qiseykerdişê xo de bale ant serê polîtîkayê HDPyî û vat: "Ma hêriş û hedefgirewtişê HDPyî nêzdî ra taqîb keno. Tewr peyîn Îzmîr de Denîz Poyraz ameye qetilkerdiş. Reyna HDP sey berpirsîyarê şewatê daristanan ame ramojnayîş.  Zîhniyetê AKP-MHPyî wazeno ke hemverê HDPyî hişmendîyêk awan bikero. Labelê şar bi nê kampanyayan wayîrê HDPyî vejêno. Çarçewaya kampanyaya 'Ma HDPyî yê, her ca de yê' HDP, tax bi taxe, dewe bi dewe, bajar bi bajar şino serdayîşê şarî. HDP xo bi rêxistin keno û pîl keno. Şar zî bi rêxistinbîyayîşê helwestê xo pîl keno."

 

'Ma her ca de yê' 

 

Gulcîhane qiseykerdişê xo wina qedêna: "Muhtewayê kampanyaya ma serê waştişê komelî de aver şino. Siyasetêk lêşin esto û bi vatişê Sedat Peker zî no sîyaseto lêşin tewr zêde vet werte. Bi her hawa Tirkîya de talan û kaos esto. HDP hemverê nînan de mîyanê têkoşînî de yo. Ma cinî her ca de yê û her ca de bê."