Hîkmet Tunç 

 

WAN - Hemşaredara Qelqeliyî ya ke vera ci qayûm amebi tayînkerdiş Dîlan Orencî derheqê N.O ya ke bi hîrê tûtanê ci dir întîxar ameyîne ferzkerdiş ser o qisey kerd û vat: "Rastîyêk esto û N.O bi şîdetê psîkolojîk dir rî bi rî menda. Rewşa travmatîk ya N.O û tûtanê aye ganî bêro telafîkerdiş.”

 

Wan de hûmara cinîyê ke seba şîdetî, peynîya cuya xo anê xeylêk zêde ya. Taxa Astecoya qezaya Qelqelîya Wanî de 31ê temmuze de cinîya bi namêyê N.O waşt peynîya cuya xo û tûtanê xo bîyara. N.O dima ra sûcê ‘teşebusê kiştişî’ ra ameye destbendkerdiş. Hemşaredara Qelqelî ke vera ci qeyûm ame tayînkerdiş, Dîlan Orencî derheqê serebûtî ke Astecoyî de qewîmya û şîdetê hemverê cinîyan de ajansê ma rê qisey kerd.

 

'Psîkolojîyê cinîyan xira bena'

 

Dîlane qiseykerdişê xo de wina bale ant serê prosesê zewicnayîşî: "Tîya de hûmara zewicnayîşê emrê qijî zêde ya. Dimayê zewacî zî camêrdî seba debara keyeyî şinê teberê bajarî de xebityenê. Rewşêka wina de cinî têkoşînê cuye dana, têkoşînê musayîşê cuyêka newe dana. Dimayê ke bena wayîrê tûtan zî kewena binê baro tewr giran. Wextê lazimîyê înan ê taybetî virazênê nêeşkenê bi tena sereyê xo şêrê sûke, nêeşkenê tûtanê xo rê çîyêk bigîrê. No zî psîkolojîyê înan ser o tesîrêk xirab verdeno."

 

'Cinî bi tena sereyê xo manena...'

 

Dîlane dewam de wina qal kerd: "Cinî vera şîdetî de bêveng manenê û no zî rastîyêk bi dej o. Cinî wexto zewicinê keye vano, 'ti bi veyvî şina û ti do bi kefen bivejyê.'  Bi nê vatişî dir xora pêro berî yenê padayîş. Cinî zî fikrîyena û vana, ‘ez nêeşkena keyeyê xo ra vaja', 'do komel vajo çi, keye vajo çi.' Seba nê zî mîyanê şîdetî de bi tena sereyê xo manena."

 

'Mi tena meverdê'

 

Dîlane tewr peyîn bale nat serê serebûtê ke Astecoyî de qewimya û vat: "N.O zî sey cinîyê bînan yena zewicnayîş û keyeyê mêrdeyê xo dir ciwîyena. Mêrdeyê aye şino teberê bajarî de xebityeno. Ma bi her di keyeyan dir zî pêvînayîş kerd û her di hetê zî  îdia kerdî ke ‘tu problem çin o.' La ma bi şahid ke N.O bi hîrê tûtanê xo hewl da ke peynîya cuya xo bîyara. Na cinî şîdetê psîkolojîk dir rî bi rî menda. N.O vatibî 'mi tena meverdê' ma fam kenê û lazimîyê ci bipaştdayîşê psîkolojîk esto. Seba nê zî  ganî rewşa travmatîk a cinî û tûtanê ci bêrê telafîkerdiş."