RIHA - Nobeta "Edaletî" ya keyeyê Şenyaşarî 160 rojî yo dewam kena û keye ewro mesajê, "Mebê hemparê sûcî" da.

 

 Nobeta "Edaletî" ya Emîne Şenyaşar ke mêrde û di lajê ci hetê merdim û pawitoxê Parlamenterê AKPyî yê Rihayî Îbrahîm Halîl Yildiz ra ameyî qetilkerdiş û lajê ci Ferît Şenyaşar ke hêriş de bi birîndarî xelas bibi, roja 160ine dewam kena. Seba ke ewro edlîye padeyeya, keye nobeta xo banê xo yê Pirsûsî de dewam keno.

 

Keyeyê Şenyaşarî, serê hesabê xo yê medyaya dijîtalî de nê mesajî da: "Dewleta huqûqî de tu selahîyetdar berpirsyarîyê xo ra nêremeno. Nêweşxaneyê dewlete de vernîya kamerayê asayîşî de qirkerdişêk ameyo kerdiş. Dozgerî 23 kesê ke qirkerdiş kerdibî, tespît kerdibi. Tena qanûnan bi ca bîyarê. Mebê hemparê sûcî."