AMED - Fatma Yildiz ke seba debara xo bikero tezgah akerd û berardişê keda destê xo roşena. Fatma vana ke seba emrê pîlî, zehmetîyan ancena û vat, qezenc qîm nêkeno la mecbûr a bixebityo.

 

Seba polîtîkayê îqtîdarî krîzê ekonomî giran bi û welatî êdî nêeşkenê lazimîyê xo yê sereyîn zî bi ca bîyarê. Seba krîzî bi desan kargehî ameyî padayîş, hîn karsazan peynîya karê xeylêk kesî ard. Heto bîn ra zî keda cinîyanê ke  faturayê krîzî înan rê ameyo birnayîş, nîno vînayîş. Cinîya bi nameyê  Fatma Yildiz ya  75 serrî ke Amed de hîrê serrî yo seba debara xo bikero, berardişê xo serê tezgahê ke akerde yo roşena, yew cinîya ke keda ci nîna vînayîş a. Pêwa emrê pîlî mecbûr a ke bixebityo.

 

'Qezencê mi çin o' 

 

Fatma derheqê babete de qisey kerd û vat: "Rewşa ekonomîya mi baş nîya. Kesêk mi çin o. Ez mecbûr a bixebityî. Ez berardişê ke însanan viraştê ana roşena. Ez rojane 20-25 TL qezenc kena. Reyan zî qet çîyêk nîno rotiş. Seba berardişî ê mi nîyê, qezenc zî heme ê mi nîyo. Ez serê sibayî de tîyaya, qet qezencê mi çin o."

 

'Destûr nêdanê ke ma her ca de biroşê'

 

Fatma dîyar kerd ke a tena ciwîyena û kesêk ra zî hetkarî nêwazena û wina dewam kerd: "Nêverdenê va her ca rotiş bikerê. Zabite vanê qedexe yo û ma wurznenê. Ma verê berê merdiman tezgahê xo akenê. Ez serê sibayî 09.00 de dest pêkena û 17.00 de şina keye. Seba pandemî karê ma baş nîyo. Hîrê serê verê ma rojane 100 TL qezenc kerdêne û nika ma nêeşkenê çîyêk  qezenc bikerê.”