Sema Çaglak 

 

AMED - Derheqê xoverdayîşê ke 261 rojî yo zîndanan de dewam keno de keyeyê tepişteyan  vengdayîşê yewîye kerdî û vatî: "Ma bibê yew do tecrîd wurzo û ma do azad bibê."

 

Zîndanê herême û Tirkîya de her roja ke derbaz bena teda û zordarî zêde benê û heqê tepişteyan yenê binpaykerdiş. Hemverê tecrîdê Rayberê PKKyî Abdullah Ocalan û binpaykerdişê heqê tepişteyan de tepişteyê PKKyî û PAJKî ke 27ê teşrîna peyêne 2020 de dest bi grevê vêşanî kerdî û xoverdayîşê tepişteyan 261 rojî yo dewam keno.  Çalakîya ke 5 rojan ra reyke dewrê komêke bîn ameyîne kerdiş 14ê Temmuze ra nata 15 rojan reyke bidor bi dewrgirewtişê koma 49ine dewam kena. Keyeyê tepişteyan û temsîlkarê sazgehê sivîlî bale antî serê xoverdayîşê tepişteyan û  ajansê ma rê qisey kerdî.

 

'107 zîndanan de grevê vêşanîye dewam keno' 

 

Hemsereka Komeleya Paştdayîşî ya Merdimê Tepişteyan dir (TUAY-DER), Guler Yuksekbag, destpêkê qiseykerdişê xo de bale ant serê rewşa weşîya tepişteyan û vat: "Nika 107 zîndanan de çalakîya grevê vêşanîye esta. Tepişteyê ke kewenê grevê vêşanî, înan rê cezaya hucre yena dayîş. Xeylêk tepişteyê nêweş û tepişteyê ke rewşa înan xirab a estê. La pêwa nînan reyna înan kenê hucre. Merdimê tepişteyan seba îmkanê kêmî û rayîrê dergî bi serran o nêeşkenê merdimanê xo bivînê. Seba pandemî pêvînayîşê akerde qedexe kerdî. Sewbîna sereştişê gardiyanan ê bi serê koxuşan dewam keno û coka zî Zîndanê Amedî de 7 kesî bi korona kewtî."

 

'Ma bibê yew do tecrîd wurzo û ma do azad bibê' 

 

Remzîye Odungît ke lajê ci Çekdar Odungît zîndanê Panosê Agirî de tepişte yo, dîyar kerd ke lajê ci bi  9 serrî yo tepişte yo. Remzîye wina vat: "Seba ke ma yew nîyê û her ca de ma bi hêrîş û tedayan dir rî bi rî manenê. Sewbîna tecrîdê serê ma de zî her ke şino tewr giran bo. Eke ma bibê yew do tecrîd wurzo û ma do azadî bidest bikerê. Dewlete semedê çalakîya grevê vêşanîye ke bi mengan o dewam kena, xo kerr û lal kerda. Rewşa tûtanê ma perîşan a. Bi çalakiya grevê vêşanîye tewr zêde serê tepişteyan de zulm û zordarî yeno kerdiş. Ez tena seba lajê xo ney ez wazena seba pêro kurdan têkoşîn bikerî. Seba nêweşî bi di serrî yo ez nêeşkena lajê xo bivînî. Wa heme kes destê xo bido wijdanê xo, wa êdî tûtê ma nêmirê. Mi di tûtî xo vînî kerdî û ez nêwazena ê bînan zî vînî bikerî."

 

'Ganî şar nê zulmî qebûl nêkero' 

 

Emîne Kuslu ke lajê ci Zîndanê Tîpê F yê Amedî de tepişte yo, 3 serrî yo hucre de yo. Emîne vat ke lajê ci cezaya muebetî girewto û vat: "Ma dayîkî bi serran o seba tûtanê xo bermenê û kezeba ma veşena. Êdî bes o tûtê ma zulm vînenê. Lazimîyê tepişteyan bi ca nêanê. Serê tepişteyan de tecrîd esto. Gama ma şinê pêvînayîş zî seba qîrayîşê gardîyanan ma nêeşkenê yewbînan fam bikerê û uca de zî hemverê keyeyan teda kenê. Tepişteyî vanê heta ke şarî vengêke xurt nêvejîyo, do no zulm dewam bikero. Ma nê zulmî qebûl nêkenê û veng danê ke wa pêrê keyeyê tepişteyan wurzê serê lingan.