RIHA - 159 rojî yo keyeyê Şenyaşarî bi waştişê edaletî vernîya Edliyeyê Rihayî de nobete gênê, keye çalakîya xo de no mesaj da: "Cezaya pereyan nêeşkeno zorê ma bero. Têkoşînê ma pîl beno û dewam keno. Heta ke waştişê ma bi ca bêro ma do tîya bê."

 

Çalakîya nobeta edaletî ya keyeyê Şenyaşarî ya verê Edlîyeyê Rihayî de roja 158ine de dewam kena. Keye saetê serê sibayî de verê edlîye de dest bi çalakîya xo kerd.

 

Ferît Şenyaşar derheqê çalakî de qisey kerd û vat: "Têkoşînê ma binê zulmî de dewam keno. Kesê ke afîşan diznenê, afîşan sebeb nîşan danê û ceza nusenê, fikrîyenêê ke ma do fek waştişê xo yê edaletî ra vera bidê. Vizêr reyna polîsan zulm bi ma kerd. Ma afîşê xo de vanê;  heq, huqûq û no zulm peynî bibo. Dozgerî û mudurîyetê polîsan waştişê ma yê muhakameyê kesê ke 3 merdimê ma qetil kerdî rê cezaya pereyan da. Cezaya pereyan nêeşkena zora ma bera. Têkoşînê ma pîl beno û dewam keno. Heta ke waştişê ma bi ca bêro ma do tîya bê."

 

Keyeyê Şenyaşarî serê hesabê xo yê medyaya dîjîtalî de zî wina vat: "Nobeta ma ya vernîya edliyeyî, netîceyê bêçaretî, kerb, dej û xeman o. Şima fikrîyenê ke do wina bimano. Waştişê edaletî û adirê zerrîya dayîke de ke veşeno, do saltanatê bişatafat birijno.