Rojda Aydin 

 

ŞIRNEX - Keyeyê tepişteyan ê Şirnexî bale ant serê tecrîd û tedayê hemverê tepişteyan û vatî: "Semedê tecrîdî, nika Kurdistan û Tirkîya de şerêk xidar esto. Seba no şer, zulm û teda peynî bibo, ganî tecrîd bêro wedaritiş. Heta peynî ma do pey waştişê tûtanê xo de bê."

 

Zîndanê herême û Tirkîya her roja ke derbaz beno teda û zordarî zêde benê û heqê yenê binpaykerdiş. Hemverê binpaykerdişê heqan û hemverê tecrîdê Rayberê PKKyî Abdullah Ocalanî 27ê teşrîna peyêne 2020 de grevê vêşanîye zîndanan ame destpêkerdiş. Çalakî 259 rojî yo bêmabên pêwa teda û zordarîyan dewam kena. Keyeyê tepişteyan ajansê ma rê qala rewşa tepişteyanê xo kerd û vengdayîşê  bi peynîkerdişê tecrîdî kerdî. Keye, rewşa tepişteyan û waştişê xo ajansê ma rê qal kerd.

 

Taybet Acet ke lajê ci Mustafa Acet Zîndanê Bandirmayî de tepişte yo, ard ziwan ke 60 serrî ceza ci rê dayê û 11 serrî yo tepişte yo. Taybete wina qalê lajê xo kerd û vat: "Gama ke tûtanê ma benê nêweşxane bi cigêrayîşê viran dir rî bi rî manenê. Heta ke zereyê fekê înan zî gêrenê. Benê nêweşxaneyî zî bi kelepçe benê. Tepişteyê nêweşî nînê tedawîkerdiş. Tûtê ma zî nê çî qebul nêkenê. Hukmat çi tutanê ma ra wazeno. Xora mîyanê çar dêsan de yê. Çîyê ke hemverê tûtanê ma yenê kerdiş, bêhuqûqî yê.  Ma nê îşkence, teda û tehdîdan qebûl nêkenê. Êdî ma nê zulmî nêwazenê."

 

Lajê Taybete 11 serrî yo tepişte yo û 8 serrî yo zîndanê Bandirmayî de yo û wina vat: "Seba ke zîndan zaf dûrî yo, ma nêeşkenê şêrê pêvînayîşî c. Tûtê ma nêzdîyê ma nêkenê û bi zaneyîş ma ra dûr fînenê. Wîjdanê dewlete çin o. Lajê mi telefon de ma rê qalê zêdebîyayîşê tedayan kerd. Hemverê tedayan zî tepişteyî pêvînayîşê bi telefonî red kerdê û tena 5 deqiqeyan seba zanayîş bidê keye qisey kerdê."

 

'Bêvengî merdiş xo dir ano'

 

Taybete dewam de wina vat: "Zîndanan de çalakîya grevê vêşanîye esto. Rewşa tûtanê ma baş nîya. Serê înan de zulm tewr zêde bîyo. Tûtê ma semedê tecrîdê serê serekî bêro wedaritiş û semedê zulm biqedîyo dest bi çalakî kerdî. Waştişê tûtanê ma waştişê ma yo zî. Labelê teber de bêvengîyêke esto. Ganî heme şar wurzo serê lingan û vengê xo berz bikero. Bêvengî merg xo dir ano. La ma bêveng nêbenê. Lajê mi bi di rey tewrê grevî beno, reya ewilî 3 mengî grev dewam kerd. Nika reyke bîn grev de yê. Xora weşîye ci baş nîya."

 

Bi tena odayêke de yo 

 

Naîf Îşçî Zîndanê Tîpê T yê Xelatî Bedlîsî de yo û dayîka ci Nebahat Îşçî dîyar kerd ke Naîf 14 serrîya xo de bi bahaneyê “Endamê rêxistine yo û serê nameyê rêxistine ser o çalakî kerdo" ameyo tepiştiş û 24 serrî yo cezaya ci rê ameya birnayîş û 11 serrî yo tepişte yo û Nebahate wina vat: "Lajê mi dimayê ke ame tepiştiş ey şawitî zîndanê Sêrtî. Dimayê 6 serran ûca ra zî surgunê Zîndanê Tîpê T yê Bandirmayî kerdî û bi 5 serrî yo ûca de tepişte yo. Semedê nêzdîbîyayîşêk bibo sewqê xo Amed, Wan û Şirnexî ra waşt. Lêbelê bi nêzdîyo mengêke sewqê ci wedarnayî zîndanê Xelatî. Ûca ma ra dûrî yo. Ûca de zî tepişteyê sîyasî çin ê. Lajê mi tena odayêke de yo. Çi ma û tûtanê ma ra wazenê. Ma yewbînan ra dûr fînenê. Eke lajê mi bêro nêzdî ez o her hewte şêrî pêvînayîş. Semedê nêweşîya ci ez bi endîşeyîn a. Ez tîya veng dana, wa waştişê tûtanê ma bi ca bîyarê û ez wazena nêzdîyê tûtanê xo bî."

 

'Wa na bêvengî peynî bibo' 

 

Nebahate tewr peyîn veng da îqtîdarî û vat: "Verê ke zîndanan de rewşe giran bibo, ganî waştişê tûtanê ma bi ca bîyarê. Wa na bêvengî peynî bibo. Waştişê tûtanê ma waştişê ma yo. Heta merdişî ma do pey waştişê tûtanê xo bi."