Derya Ren

 

DÎLOK - Dûrî Kaygusuz bale ant serê rewşa lajê xo yê tepişteyî û vat: "Lajê mi Şaban nêeşkeno lazimîyê xo yê rojane bi tena sereyê xo bikero. Xeylêk tepişteyê wina estê û ganî sere de tepişteyê nêweşî û pêro tepişteyê sîyasî serbest bêrê veradayîş."

 

Zîndanê herême û Tirkîya de her roje ke derbaz beno binpaykerdişê heqê tepişteyan zêde beno. Semedo ke tepişteyî bi hawayêk baş nînê tedawîkerdiş, nêweşîya înan tewr zêde giran bena. Goreyê "Raporê Zîndanan ê serra 2020" ê Komeleya Heqê Merdiman (ÎHD) temamê zîndananê Tirkîya de 604 tepişteyê nêweşî estê. Labelê na hûmare her roja ke şina tewr zêde bena.

 

Şaban Kaygusuz pêrodayîşêk de mil û çaqeyê xo yê rast vinî kerd û nêame tedawîkerdiş û nika Zîndanê Tîpê D yê Amedî de yeno tepiştiş. Dayîka ci Dûrî Kaygusuz, ters û endîşeyê xo hemverê nêweşîya lajê xo ajansê ma rê qal kerd. Dûrîye sere de waştişê serbestveradayîşê heme tepişteyê nêweşan kerd.

 

'Rewşa lajê mi baş nîya'

 

Dûrîye ke Dîlok de ciwîyena, menga teşrîna verêne serra 2019 de bi bahaneyê, "Endamîya rêxistine" û "Propagandayê rêxistine" amebî tepiştiş. 11ê gulana 2021 de bi 4 kesan dir serbest ameya veradayîş. Dûrîye wina bale ant serê lajê xo: "Lajê mi serra 2018 de pêrodayîşêk de bi birîndarî ame tepiştiş. Lajê mi zîndan de nêeşkeno lazimîyê xo yê  rojane bi tena sereyê xo bi ca bîyaro. Ez 28ê temmuze de şîya serdayîşê ci la rewşa ci qet baş nêbî. Nêeşkeno werd biwero û cilanê xo bişu. Semedo ke hem mil û hem zî çaqeyê ci çin o. No çî tesîrêk negatîf serê lajê mi de keno. Gama ke mi pêvînayîş de persê lajê xo kerd, ey mi ra vat: "Rewşa ma zehmet a û ez nêeşkena lazimîyê xo bi ca bîyara."

 

'Goş bidê rewşa tepişteyan'

 

Dûrîye qiseykerdişê xo de bale ant serê rewşa zîndanan û vat: "Tepişteê nêweşî hem hetê psîkolojî de û hem zî hetê fîzîkî de xeylêk probleman ciwîyenê û rewşa înan baş nîya. Ez sere de veng dana sazgeh û dezgehê sivîl û taybetî zî Komeleyê Heqê Merdiman û Dadgeha Heqê Merdiman a Ewropa, wa goş bidê rewşa tepişteyan. Cezaya ke dayî lajê mi, mi xemgîn keno. Semedo ke lajê mi nêeşkeno bi tena sereyê xo cuya xo dewam bikero. Ez veng dana her kesî ke goş bidê rewşa ci."

 

'Ganî pêro tepişteyî serbest bêrê veradayîş'

 

Dûrîye tewr peyîn wina vat: "Ganî lajê mi zîndan de nêmano. Ez sey dayîkêke tena semedê lajê xo ney, ez semedê pêro tepişteyan xemgîn benaç Zerrîya pêro dayîkan veşena. Sere de tepişteyê nêweşî û tepişteyê sîyasî serbest bêrê veradayîş. Rojêke bo zî wa cuya înan roşn bibo û azad biciwîyê. Şabanê mi qij o û ez rewşa zîndanan baş zana ke zehmet o. Seba nê ganî tu tûtî zîndanan de nêmanê."