STENBOL - Berfîn Polat ke endama LOBî ya ke çalakîyê serrsera 6ine Pirsûsî de ameye destbendkerdene û hetê polîsan ra milê ci ame şikinayîş, dîyar kerd ke waştişê edaletî yo û wina vat: "Milê ma bêro şikinayîş zî ma do fotografê 33yî wedarnê û xeyalê înan dewam bikero."

 

20ê Temmuza 2015ine de bi hêrişê DAÎŞî 33 raywanê xeyalan dinyaya xo bedilnayî. Semedê 6in serrgera qetilkerdişê 33 raywanê xeyalan ame waştane ke Kadikoy de çalakîya vîrardişî bikerê labelê polîsan hêriş kerd. Bi îşkence 60 kesî ameyî destbendkerdene. Sewbîna polîsan bi derbê plastîk hêrişê kedkarê çapemenî kerd. Demê destbendkerdişî de zî hêrişê polîsan dewam kerd. 

 

Xeylêk kesî bi derbê plastîkî û bi paskilê polîsan zî xeylêk kesî birîndar bî. Mîyanê hêrişan de milê endama Yewîya Wendekarê Mektebê Amedekarî (LOB) Berfîn Polat şikiya. Berfîne derheqê çîyê ke ameyî sereyê ci ajansê ma rê ercnayîş kerd û dîyar kerd ke no hêriş hemverê waştişê edaletî yo û ê do edalet kuçeyan de bi dest bikerê.

 

'20 Temmuze semedê roja hesabperskerdişî yo'

 

Berfîne wina qalê vîrardişê Pirsûsî kerd û vat: "Embazê ma semedê awankerdişê bajarêk amebi rijnayîş şî. Şîbî ke dest bidê Şorişê Rojawan û cuyêka newe awan bikerê. Sey Ezgî vatibi rastiyêk Şorişê Rojawanî esto. Ma nêeşkenê nêvînaye bivînê. Bi 6 serrî yo kuçeyan de ma sey keyeyêk û embazê raywanî xeyalan têkoşîn pîl kenê. Ma edalet, kesê ke ma qetil kerdê hêvî nêkenê. 20ê Temmuze semedê roja hesabperskerdişî yo."

 

'Fermandarê înan fermanê kuyayîşî dayîne'

 

Berfîne wina qalê serebûtî kerd: "Mi destbend kerdî û bi erd kaş kerdî. Sewbîna guleyê plastîk zî veradayî mi. Fermandarê înan vat, na bikerê wesayît û îşkence bi mi kerdî. Pêwa milê min o şikite zî îşkenceyê kelepçeyê verpay kerdî. Zere de nêweşxane de zî îşkence bi mi kerdî. Rapor de derbê ma nênuştî. Sereyê ma dayîne caman ro û nêverdayîne ma avûkatê xo bivînê."

 

'Semedê polîsan hêriş kerdibî nêweşxaneyî rapor nêda'

 

Berfîne tewr peyîn wina vat: "No hêriş hemverê waştişê edaletî yo. Ê vanê qey bi nê hêrişan ma do peyser game bierzê. Ma do têkoşînê xo yê edaletî dewam bikerê û kuçeyan de bê. Milê ma bêro şikinayîş zî ma do fotografê 33yan berz bikerê û xeyalê înan dewam bikerê."

 

Tewr peyîn Berfîne veng da ke heme kesî paştdayîş bidê dewaya Pirsûsî ya do 23yê êlule de bêro vînayene.