RIHA - Emîne û Ferît Şenyaşar yê ke 141 rojî yo verê Edliyeyê Rihayî de çalakîya nobeta "edaletî" de yê, vengdayîşê paştdayîşî kerdî û vatî, "Ma bi edaleto ereymende zî razî yê. Wa no zulm peynî bibo."

 

Keyeyê Şenyaşarî (Emîne Şenyaşar û lajê xo Ferît) 141 rojî yo verê Edliyeyê Rihayî de bi waştişê “edaletî” nobete gênê. Keye ewro zî ame verê Edlîye û dest bi çalakîya xo kerd û reyke bîn waştişê edaletî kerd.

 

'Wa sucdarî bêrê cezakerdiş'

 

Ferît Şenyaşar ke bi dayîka xo Emîne dir nobeta “edaletî” dewam keno wina vat: "Têkoşînê ma yê edaletî pêwa 45 dereceyî germ de zî dewam keno. Hemverê keyeyê mi de qirkerdişêk ame kerdene. Serekkomar, qeymeqam, walî û dozger û dadger, her kes nê qetliamî baş zano. Ma wazenê wa ganî dewa bêro akerdene û sucdar  wa bêrê cezakerdene. Ez û dayîka xo 141 rojî tîya yê. Her tim ma destbend kenê. Ma tîya reyke bîn  vengdayîşê rêxistinê huqûqî kenê; paştdayîşê bidê dewaya ma ya heqdar. Eke şima paştdayîş bidê ma û ma heme vengdayîşê ‘edaletî’ bikerê, do mexdûrîyetê wina Tirkîya de peynî bibê. Vatişêk esto vanê, ‘edaleto ke erey bêro edalet nîyo' labelê na saete ra dima ma bi edaleto erey ra zî razî yê. Êdî no zulm biqedîyo."

 

Vengdayîşê paştdayîşî ame kerdiş

 

Keyeyî serê hesabê xo yê Twitterî de zî waştişê xo vila kerd û dîyar kerd ke ê edalet wazenê û vengdayîşê paştdayîşê rêxistinê huqûqî kerd.