EDENE - Cinîyê ke tewr zêde krîzê ekonomî ra tesîr benê, karê ke xebityenê de ge-ge nêeşeknê nanêk zî n berê keyeyê xo. Fatma Kalecek ke semedê meşlûlê bi gozan kena lawa û hewl dana ke debara xo bikero problemê xo qal kerd û vat: "Ma reyan vêşan zî rakewenê."

 

Taxa Şakîrpaşa ya qezaya Seyhanê Edenî ke xeylê xo kurdî ci de manenê, cinî semedê debara xo bikerê karê tewir bi tewir de bi kedêk erjan xebityenê. Cinîyê ke semedê krîzê ekonomî bi karê ke kenê nêeşkenê şan de nanêk zî berê keyeyê xo, bi heqdestêk erjan kedkarîya mewsîmî kenê.

 

Cinî semedê meşlûlan gozan kenê lawa û şawenê fabrîkayan. Semedê 12 kîlo ke kenê lawa 50 TL heqdest gênê. Cinîyan dîyar kerd ke pawakerdişê kakilê gozan, karêk asan nîyo û vatî ke ma heqê keda xo nêgînê.

 

'Ma reyan nêeşkenê nanêk zî bigîrê'

 

Nê cinîyan ra yew zî ke karê gozan kena Fatma Kalecek a. Fatma wina qal kerd: "Ma bi saetan verê fabrîka de manenê ke gozan bigîrê. Ma bi kîsîkan gozan gênê û bi erebokê destan benê keyeyê xo. Ma serê kîsî 50 lîra gênê. Ma kîsêk reyan rojêke û reyan zî hewteyêk de qedênenê. Semedo ke hem karêk zehmet o û hem zî ma karê keyeyî dir eleqedar benê. Pereyê ke aşme de keweno destê ma 300 û 400 TL vuryeno. Ma bi nê pereyî nêeşkenê fatureyê keyeyê xo zî bidê. Xeylêk rey ma nêeşkenê şêrê sûke yan zî bazar. Reyan ma neeşkenê nanêk zî bigîrê û ma vêşan kewenê ra."

 

'Ma yewbînan rê pare kenê'

 

Fatma vana gama ke gozî kêm vejîyê pereyê înan ra şiknenê û wina dewam kerd: "Reyan no karo ke ma kenê zirar zî dano ma. Karêko zehmet o. Merdim xeylêk beno rincan. Keda cinîyan yen apelçiqnayîş. Ma wazenê ke heqdestêk ke ma heq kenê bigîrê. Ma bi nê karî debara keyeyê xo kenê."

 

Fatma vat ke ê bi cinîyan dir karê xo pare kenê û wina qiseykerdiş xo qedêna: "Ma bi hemkarî karê xo kenê. Semedo ke ma yenê têhet, reyan ma nê sey pêvînayîşê cinîyan û îmkanê ke ma pîya sohbet bikerê zî vînenê. Cinî barê karî pare kenê. Her ca de keda cinîyan yena pelçiqnayîş. Ma bi nê pelçiqnayîşî dir bi paştdayîş sere vejênê."