Habîbe Eren

 

İSTANBUL - Avûkata Feminist Canan Arîn vat ke hêrişê cinsî yê hemverê tutan de cigêrayîşê delîlê somutî do hêrişkaran teşwîk bikero û vat ke 4in Pakêta Hukmî de do dê pênaseyê hêrişê cinsî û çarçewaya ci zî bivuryo. Canane îqaz kerd ke  rojê ameyox de qanûno 6284 û yê Medenî zî bibo hedef.

 

4in Pakêta newe ya hukmî ke 27 madeyê qanûnî û hîn vurnayîşê qanûnî de mîyanê xo de hewêneno de 13 madeyî 7ê Temmuze de û 13 madeyê mende rojê vîyarte de Heyetê Pêroyî yê Meclisî ameyî qebûlkerdene. Goreyê qanûnê babeta vatişî semedê kesê hêrişê cinsî kenê, qetilkerdiş û îşkence kenê ganî delîlê somutî bibê, hetê meclîsî ra ame qebulkerdene. 

 

Avûkata Feminist Canan Arin derheqê 4in Pakêta Hukmî de ercnayîş kerd.

 

‘Sucê hêrişê cinsî mîyanê çar dêsan de yeno kerdene’

 

Canane dîyar kerd ke eke bi rastî zî meclis bibayîne, do no qanûn meclis de nêameyîne qebûlkerdene û vat: "No yeno manaya ke do tewr asan şêxê tarîkatan bieşkê hemverê tutan sucê hêrişê cinsî bikerê. Sucê hêrişê cinsî mîyanê çar dêsan de xêrcê ke kes bivîno yeno kerdene. Coka do delîlê somut çinbê. Tut/e tena eşkeno/a xo bi resimê ke xêz keno/a bîyaro ziwan. Tutî yenê tehdîtkerdiş û tersnayîş. Coka zî do nêeşkê derdê xo vajê. Nê tutê ke ameyê tersnayîş do delîlê somut çara bîyarê.”

 

‘Dore de qanûno 6284 û yê Medenî esto’

 

Canane vat ke dadgerêk ke wicdanê ci bibo no metod nêxebitneno û var: "Eke no serebût bêro sereyê tutan, do se bikerê gelo? La kesê ke tecawuzkerdişê tutan semedê xo heq vînenê, do semedê înan no zî bimana bo. Goreyê Qanûnê Cezaya ya Tirkî,  her tut/e ke emrê înan 15 nêqedênabi û ne ferqê çîyo ke ameyo sereyê înan de binê her têkiliyê ke warê cinsî de înan rê bêro ronayîş, suc yeno hesibnayîş.”

 

‘Semedê berjewendîyê xo pawenê’

 

Canane dîyar kerd ke zîhniyetê na pakêta hukmî ke meclîs ra derbaz kerd, bi nê dir zî amancê xo dîyar kerda û vat: "Heme hiş û aqilê înan serê tut û cinîyan o ke hemverê înan sucê cinsî bikerê. Cinîyan sey makîneyê tutan vînenê û hepsê keyeyî kenê. Nê dir zî wazenê ke cinîyan wareyê kar ra biancê mîyanê çar dêsan, camêrdan rê cayê îstihdamî abikerê û cinîyan bikerê îteatkarê xo."