AMED - Şubeyê ÎHD yê Amedî û Merdimê Vîndîbîyayeyan aqûbetê Îhsan Haran o ke 27 serrî verê hetê JÎTEMî ra ame remnayîş û vînîkerdiş pers kerdî û vatî, 27 serrî yo tu xebere ci ra nêameyo girewtene.

 

Komeleya Heqê Merdiman (ÎHD) ê Şubeyê Amedî û Merdimê Vîndîbîyayeyan bi sloganê, “Wa vîndîbîyayeyî bêrê vînayîş û kerdoxî bêrê muhakemekerdiş" hewteyê 650 de çalakîya hewtane kerdî. Semedê janê koronayî bi rayîrê online çalakî amî organîzekerdiş. No hewte aqûbetê Îhsan Harano ke 25ê kanûna 1994 de qezaya Yenîşehîrê Amedî de hetê kesê bêtêl destê înan de ame remnayîş û reyke bîn xebere ci ra nêame girewtiş, pers kerdî.

 

Îdarekarê Şubeyê ÎHDyî yê Amedî Sedat Gorduk hîkayeyê vînîkerdişê  Îhsanî qal kerd. 

 

'Polîsan ey remna'

 

Sedatî dîyar kerd ke Îhsan serra 1994 de dewa Huseynikî ya girêdayê qezaya Licê de mendêne la semedo ke leşkeran eşto serê dewe û veşnayo, ameyo Amed de bi ca bîyo û eynî serre Semtê Çîftkapi de hetê polîsanê bêtêl destê înan de bi, ameyo remnayene.

 

Sedatî dîyar kerd ke semedê Îhsanî cipersayîş ameyo destpêkerdiş û semedê tu netîce ci ra nêvejîyayo, keyeyî bi rayîrê ÎHDyî muracatê Dadgeha Heqê Merdiman ê Ewropayî kerdê û semedê vînîkerdişê Îhsanî, Tirkîya ameya mehkûmkerdiş û qerar dayo ke Tirkîya tazmînat semedê keyeyî bido.

 

'Tu xebere Îhsanî ra nêameye girewtiş'

 

Sedatî dîyar kerd ke pêwa îtîrafkarê JÎTEMî Abdulkadîr Aygan serra 2009 de semedê kerdişê ke herême de kerdê, mikûr ameyo zî û derheqê vînîkerdişê Îhsanî de xebere dayê zî la reyna tu xebere ci ra nêameya girewtiş û vat ke, dimayê nê xomikurameyîşî Abdulkadîr Aygan keyeyê Îhsanî gerre kerdo zî la no gerrekerdiş bênetîce mendo û hema tu xebere Îhsan Haranî ra nêameya girewtiş.