Derya Ren -Rozerîn  Gultekîn

 

AMED - Amedîyê ke hemverê nîjadperestî ma mikrofon da verê înan û cinîyan dîyar kerdî ke hêrişê serranê 90an ewro yeno reynakerdiş û vatî, "Polîtîkayê şerê taybeî yenê kerdiş. Ganî sîstem bêro vurnayîş."

 

Tirkîya de hêrişê nîjadperestî hemverê kurdan her ke şino zêde beno. Tewr peyîn 20ê Temmuze de taxa Kavakli ya qezaya Altindagî ya Enqerî de nîjadperestan hêrişê keyeyêk kurdî kerdibi. 21ê Temmuze de zî taxa Çariklikoyî ya qezaya Meramî ya Konyayî de pêwa keyayê taxe 60 kesî hêrişê keyeyêk Amedî kerdibî û keso bi nameyê Hakîm Dal dinyaya xo bedilnabi.

 

Hemverê hêrişê ke roj bi roje zêde benê, ma mîkrofonê xo Amedîyan rê derg kerd. Roniştoxê Amedeyijî dîyar kerdî ke ziwanê cîya ê dewlete beno sebebê hêrişan û vatî ke ganî kurdî hemverê nê hêrişanê nîjadperestan bibê yew.

 

'Ganî têduştî bibo' 

 

Sevda Îzol: Kurd tena na rey ney her wext rastê nê çîyan yenê. Wazenê bingehê nê çîyan awan bikerê. Nê hêrişî xovera nêbenê. Eke wina dewam bikero, do kurdî dest bi pawitişê xo bikerê. Ez kurd a wayîtî û biratî mi rê ferz mekerê. Eke ma wayê û birayê ganî ma têduşt bibayîne. Menga vîyarte de kurdê ke Hewlêr amebî 60 kesê nîjadperest hêrişê înan kerdibi. Dima ra walî eşkerayîyêk da û vat, 'serebûtêk edlî yo'. La ney serebûtêko edlî nêyo, serebûtêk bi zanabîyayîş amebi plankerdiş bi.  Nê srebûtêk rêze ya tirkan nêyo. Do nê serebûtî tewr zêde bibê. Nê problemî zî ganî sîyasetmedarî safî bikerê. Kesê ke bi serran o ma rê wayê û biratî ferz kenê, ganî problem safî bikerê. Kesê ke rayan ma ra wazenê, wa nê problemî safî bikerê.

 

'Polîtîkayê şerê taybet yenê kerdene'

 

Merve Mutlu: Bi serran o bi çimêko cîya ewnîyenê kurdan ra. No zî rayîrê nîjadperestîyê tirkan akeno. Nê serebûtî bi destûrê dewlete yenê kerdene. Kesê ke nê serebûtan kenê, hetê dewlete ra nênê cezakerdene û înan çepikan danê piro. Hende zî vanê qey çîyêk baş kerdo û karê xo dewam kenê. Eke îmkanê xebate tîya bibê, do cayê xo de bixebityê. Polîtîkayên şerê taybet kenê.

 

'Sebeb medya ya'

 

Zeynep Ozkul: Sebebêk pîl yê nê serebûtan zî medya ya. Semedo ke herêma ma ser her wext xeberanê şerî pêşkêş kena. Serebûtê weş yê herême pêşkêş nêkenê û hetê Tirkîya de zî serebûtê weşan pêşkêş kenê. Beno ke serebûtê nê rengî uca de zî benê la ma nêzanê û no şerêko psîkolojîk o."

 

'Ganî sîstem bivuryo'

 

Nedîm Evran: Ez merdimêk vera cîyakarî ya. Ganî her her kes bi hawayê têduşt biciwîyo û her kes yewbînan rêze bigîro. Dîmenê ke ez vînena mi xemgîn kenê. Ganî no sîstem bêro vurnayene. Ganî her kes tena semedê xo çîyan nêwazo."

 

'Ganî merdim matmayî nêmano'

 

Merve Ozer: Serebûtê ke qewimyenê, weş nîyê. Her kes pey nanê xo yo. Ganî rewşe nêro sabotekerdene. Çîyo ke bi kurdan kenê nêheqî yo. Nê metodê averşîyayîşî nê kesê hêrişkarî yê. Dewlete heta nika no warî de tu ceza nêdaya û do ewro ra nata zî nêdo. No karê dewlete rê yeno. Çimê xo nê hêrişan rê padana û çîyêk nêkena.

 

'Her kes neteweyê xo paweno'

 

Ayşe Kiziltoprak: Her kes neteweyê xo paweno. La dewletêke ma ya ma bipawo çin a. Ez veng dana şarê ma ke nêşêrê karê înan nêkerê. Eke şarê ma nêşêro karê înan nêkero do mihtacê ma bibê. La ma her wext vanê merdimayî. Ma sey merdiman nêzdîyê înan benê la nîyetê ma yê pak binpay kenê. Ma nê hêrişan heq nêkenê. Hetê Tirkîya herêma ma sey cayêk xirab ramojnena.

 

'Ganî herême de îmkanê xebate bibê'

 

Gulşah Demîr: Ganî kesê ma tewr zana bê. Nê kesî şinê erd û zîyanê înan ramnenê. Kesî mecbûr benê ke ca û wareyê xo semedê xebate terk bikerê. Ganî dewlete cayê herême de îmkanê xebate awan bikero.

 

'Ez Ordu ra ya hemverê mi nîjadperestî nêno kerdene'

 

Ayşe Demîrcî: Ez Ordu ra ya vana ganî her kes yewbînan dir bieşko biciwîyo. No ca de hemverê mi tu nîjadperestî nêameyo kerdene. Ganî kesî yewbînan rê rêze bigîrê. Verê ke cîyakarîyê ziwan, dîn û netewî bikerê û ganî bi hizûr yewbînan dir bieşkê biciwîyê.