Nalîn Bêrîvan

 

KOBANÊ - Serewedaritişê 19ê Temmuze bi bingehê awankerdişê cuyêka hembeş. Cinîya bi nameyê Semîra Ehmed ke bîya şahidê ê rojan derheqê 19ê Temmuze Şorişê Rojawanî de wina vat: "Bi rayberîya cinîyan şoriş, ame kerdene. Bi sloganê xoverdayîş ciwîyayîş o ma dest bi rayrayîşê 19ê Temmuze kerd."

 

Gamê destpêkî yê serewedaritişê dewletê Ereban welatê sey Misir, Cezayîr, Tûnis, Lîbya û Sûrîye dest pêkerd. No serewedaritiş sey wisarê Ereban ame binamekerdiş. Bêşik eynî îqtîdar serê şarê kurdî de zî ameyîne kerdene. Hemverê îqtîdarîyê BAASî yê Rojawanê Kurdistanî de reya ewil şarê Kantonê Kobanî 19ê Temmuze 2012 de vejîyayî wareyan û gamê şorişî yê yewin dayî destpêkerdene. Dimayê serewedaritişê şarî, Rejîmê BAASî mecbûr mend Kantonê Kobanî ra vejîyo. Şar êdî sazgeh, şaredarî û bajarê xo bi xo îdare kerd. Dimayê Kobanî şarê herêma Cizîr û Efrînî zî serewedarnayî û Rejîmê BAASî mecbûr mend ke leşker û hêzê xo temamê Vakur û Rojhelatê Sûrîye ra peyser bianco. Kesa ke nê çîyan rê bîya şahid û bi xo zî cayê xo awankerdişê Şorişê Rojawan de ca girewta, Endama Keyeyê Cinîyan ê Kantonê Kobanê, Semîra Ehmed ajansê ma rê qisey kerd.

 

'Ma cinî wayîrê rêxistinbîyayîşî bî' 

 

Semîra Ehmed wina qalê rol û rayberîyê cinîyan ê şorişê 19ê Temmuze kerd û vat: "Serra 2011 de netîceyê serewedaritişê şarî de rejîmê BAASî şaristanê ma ra vejîya. Demo ke rejîm herêma ma de îstîdar bi zî ma xebatê xo kerdêne. Ma sey cinî zî wayîrê rêxistinî bî. O wext nameyê rêxistinê ma yê cinîyan Yewîya Star bî. Ma mîyanê komelî de bi hawayêke nimte kar kerdêne. Şarî bi hawayêke hîra nameyê tevgerê ma nêzanayîne, coka mîyanê dewan, taxan û şarî de ma ra cepewî ameyîne vatene. Kesî nêzanayîne ma se kenê. Kobanê cayêko wina yo reya yewin wayîrê keyeyî Rayber Apo rê kerdo. Mi bi xo Rayberî nêdîyo, la embazê ma yê o wextî xeylê xo Rayber Apo dîyê. Embazêke ma bi nameyê Meroş estbî aye Rayberî dîbî, aye ma rê rayberî kerdêne. Ya raşt ma uca de rêxistin nas kerd. Yanî ma nêeşkenê vajê ma her her hawa rêxistin nas kerd, la heskerdişêk ma rêxistin rê virazya. Nê heskerdiş ser o ma bêmabên waştêne, ma kar bikerê."

 

'Serewedaritişê 19ê Temmuze ruh da her kesî'

 

Semîra dewam de wina vat: "Roja ke serewediritiş dest pêkerd, coşêk bê hempa zerrîya hemine de virazya. Wexto rejîmê BAASî tîya bi, semedê her kesî rojêk tarî bi. Bi taybetî zî semedê cinîyan ciwîyayîş  tarî bi. Tu îmkan nêdayîne cinîyan, zulm kerdêne. Vernîya serewedaritişê 19ê Temmuze rejîmî her roje eştêne serê keyeyan; cinî, tutî, ciwan û camêrdan îşkence kerdêne. Kes nêeşkayîne sere wedarno la cinîya ke cepewî bî vera nê kerdişna, sere wedarnayene  û hemine dorê xo de kom kerdêne. Na cinîya ke ruhê Bêrîtanan, Zîlanan û Semayan nas kerda, lazimî bi gameştişê neweî dîne. Bi taybetî cinîyî welatparêzî rê zaf baldar ê û lez xeberdar benê. Heskerdişê cinîyan ê vera welatî tewr xurt beno."

 

'Ma bi sloganê azadî dest bi rayrayîş kerd'

 

Semîra coşê şarî semedê azadî wina qal kerd: "Wexto ma newe dest bi serewedaritişî kerd ma çar cinî destpêk de derbazê cayê Kaniya Kurdan bî, ma dî uca de çar embazê ma yê camêrdî estê, destpêk de tersêk estbi, vatêne; eke rejîm vejîyayo, beno ke pêrodayîş virazyo. Dimayê ke dî cinîyî çin ê, ma vat ma şêrê meydan de vinderê, wa cinî dorê ma de kom bê. Wexto ma uca de vindertî, her kesî rê bi cayê kêfweşî û heme ameyî tewrê ma bî. Ma bi sloganê azadî, biciwîyo Serek Apo û xoverdayîş ciwîyayîş o, dest bi rayrayîş kerd. Wexto bi hezaran kesî herikyayî meydanan, êdî o tersê serê şarî zî wişt û her kesî waştêne rayberanê xo bivînê û dorê înan de kom bibê. Ma eşt serê sazgehanê dewlete û heme sazgehî kewtî destê şarî. Karmendê uca tersayî û waştiş kerdî şar înan nêkişo. Xora amancê ma înan kiştiş nêbi, amancê ma zorberdişê zulmî bi. Ma resayî amancê xo, ma rejîm şaristanê xo ra vet û îdarekarîyê xo bi îradeyê xo weçîna."

 

'Şorişê ma dinra bi nimûne'

 

Semîra tewr peyîn wina vat: "Dimayê ke rejîm şaristanê ma ra vejîya, ma heme Meydanê Azadî de kom bî û m aşhîya serkewtişî kerd. iyê kom bûn û me şahiya serkeftina Ez şahida a rojeya ke cinîyan tutanê xo bi destê xo kerdêne, mîyanê artêşe. Yê ke rayberîya tewrbîyayîşî zî kerdêne cinîyî bî. O wext nameyê artêşe sey YXK ame xebitnene. O wext dayîkan vatêne, 'Şikir rehma Homayî rê, ma zî bî wayîrê welatê xo.' Bi rastî zî gamêke pîl 19ê Temmuze de ameye eştene. Dimayê destkewtişan xeylêk sazgehê cinîyan ameyî akerdene. Ê sazgehî hetê cinîyan ra xeylêk eleqe dî û her kesî cayê xo nê xebatan de girewt. Coka ma vanê yê ke bî rayberê awankerdişê sîstemê neteweyê demokratîke ya herême de cinî yê."