Rojda Aydin

 

ŞIRNEX - Dayîkanê Cizîre serê girîngîyê yewbîyayîşê neteweyî qisey kerdî. Dayîkan dîyar kerd ke bi şer tu çî safî nêbeno û vatî: "Ma cuyêka azad û aştîye wazenê. Semedê nêz dî ma vanê ke yewbîyayîş aştîye ra derbaz beno. Bi tena yewbîyayîş eşkeno nê şerî rê bibo cewabêko xurt. Ma pêro dayîkî serê lingan de yê û vengdayîşê yewbîyayîşî kenê."

 

No demêko derg o hetê dewleta tirkî ra hemverê destkewtiş û bîyayîşê kurdan şerêk hîra ke ameyo destpêkerdene hema dewam keno. Dewleta tirkî 23ê Nîsane ra tepya Herema Federal a Kurdîstanî de hêrişêk pîl hemverê kurdan dayo destpêkerdene û paştdayîşê PDKyî de operasyonê leşkeri herême de dewam kenê. Hemverê nê hêrişan her ware de vengdayîşê yewbîyayîşê netewî yeno kerdene. Dayîkê Botanî zî ancî vengdayîşê yewbîyayîşî kerdî û vatî şer bi yewbîyayîş yeno vindarnayene.

 

'Rayîrê yewbîyayîşî aştî ra derbaz beno' 

 

Dayîka Nafîye Kûçûk, dîyar kerd ke ê prosesêk tarîxî ra derbaz benê û vat: "Ma dayîkî êdî şer, kiştiş û qirkerdiş nêwazenê. Ma cuyêka azad û aştîye wazenê. No semed ra rayîrê yewbîyayîşî aştî ra derbaz beno. Bi kiştiş tu çîyêk derbaz nêbeno. Ma kurdî wayî û birayî wazenê. La ê yenê ma kurdan kişenê. Mesut Barzanî zî kurd o. Çira paştîya xo dano dewleta tirkî. Wa kurdî, kurdan nêkişê. Ez Barzanî ra vana, dewleta tirkî hêrişê ma kena û ma kişena û do siba zî hêrişê to bikero. Wa destê xo nêdo destê dewleta tirkî. Erdogan bi serran o hêrişê kurdan keno. Mesut Barzanî zî rayîr dayo Erdogan û rayîrê koyê Kurdistanî zî ci rê akerdê. Eke Barzanî rayîr Erdoganî rê anêkerdêne, do nêeşkayîne bişîne uca. Barzanî nê senî qebul keno."

 

'Tena yewbîyayîş eşkeno bibo cewabê şerî'

 

Nafiye dewam de wina vat: "Bi serran o senî pêwa pêro hêrişan ma nêqedîyayî, na roje ra tepya zî ma xelas nêbenê. Ma êdî şer nêwazenê. Ma wazenê na gonî bêro vindarnayene. Ma cuyêka azad wazenê. Kurdî bi qirkerdişan xelas nêbenê. Do dorê Barzanî zî bêro. Îqtîdar do hêrişê ci zî bikero. Bîyayîşê kurdan qebûl nêêkenê û her wext hêrişê ma kenê. Tena yewbîyayîş no şerî rê do bibo cewab. Ma pêro dayîkî aştî wazenê. Ma nêwazenê tutê ma bêrê kiştiş. Ma wa biciwîyo Kurdistan, biciwîyo Serek Apo. Ganî ma pêro dayîkî semedê yewbîyayîşî vengê xo berz bikerê. Heta azadî bi ca nêro ma nêvindenê."

 

'Mesût çira şerê biratî keno?'

 

Dayîka Aynur Elçîoglu zî dîyar kerd bi şer û pêrodayîşî çîyêk safî nêbeno û vat: "Hemverê şerî ganî ma xo bikerê yew û yewîye awan bikerê. Semedê ma Botan û Başûr ferq nêkeno. Ganî Barzanî hetê xo baş weçîno. Ewro paştdayîş dano dewleta tirkî û hêrişê kurdan kenê. Her het ra hêrişê kurdan yeno kerdiş. No semed ra ma rê yewbîyayîşê netewî zaf girîng o. Ganî ma bibê yew. Ma cîyabîyayîş nêkenê mabêne xo. Heyfê Kurdistanî nêyo ke Barzanî vernîya dişminî akeno. Semedê vindarnayîşê şerî lazimî bi yewbîyayîş esto. Hewt serre ra heta hewtay serre ganî ma wurzê serê lingan û waştişê xo yê azadî û yewbîyayîşî bikerê. Ganî Kurdî hemverê îşxalkerdişî bi yewbîyayîşê xo bibê cewab. Ma dayîkî nê şerî bidê vindarnayîş. Çar parçeyê Kurdistanî de hêrişê kurdan yeno kerdene. La reyna ma bi yewbîyayîş eşkenê bibê cewab."

 

'Eke ma arayî bê o zî do bibo şamî'

 

Aynure tewr peyîn wina vat: "Ma cuyêka weş û bi hizûr wazenê. eke ma nêbê yew, ma do vindî bikerê. Roj roja yewbîyayîşî ya. Xêrcê yewbîyayîşî tu rayîrê ma çin o. Ma helwestê Barzanî şermezar kenê û vengdayîşê mi oyo ke nê şaşîtî ra agêrê. Wa Barzanî baş bizano ke eke ma arayî bê, ê zî şamî yê. Ma veng danê Barzanî ke paştdayîşê dişiminî nêkero û rayîro şaşî ra agêro."