WAN - Semra Gumuşlu bale ant serê xoverdayîşê grevê vêşanîye û vat, mêrdeyê ci Yaşar Gumuşlu ke Zîndanê Tîpê H yê Erziromî de tepişte yo, bi merg ameyo tehdîdkerdene û dîyar kerd ke çîyêk bêro sereyê mêrdeyê ci, îdareyê zîndanî berpirsîyar o.

 

Bi amancê wedaritişê tecrîdo ke serê Rayberê PKKyî Abdullah Ocalan de yeno kerdene û peynîkerdişê îhlalkerdişê heqê tepişteyan 27ê Teşrîna peyêne 2020 de tepişteyî kewtî grevê vêşanîye yê bêdem û bidor. Grev kewt roja 233ine. La selahîyetdarî bêvengîya xo pawenê.

 

'ÇÎyêk bêro sereyê mêrdeyê mi berpirsîyar îdareyê zîndanî yo'

 

Cinîya bi nameyê Semra Gumuşlu, dîyar kerd ke mêrdeyê ci Yaşar Gumuşlu ke Zîndanê Tîpê H yê Erziromî de tepişte yo û di roj verê pêvînayîşê bi telefonî kerdî û dîyar kerd ke îdareyê zîndanî bi merg tehdîd kerdo û vat mêrdeyê ci 15 serrî yo tepişteyo û wina dewam kerd: "Semedê heqê xo pawitî, nika zîndanan de yê. Her tim bi talîmatê îdareyê zîndanî, mêrdeyê mi rê îşkence yeno kerdene. Bi vatişê, ‘ma do to daliqnê' mêrdeyê mi tehdîd kerdî. Çîyêk bi mêrdeyê mi bibo, berpirsîyar îdareyê zîndanî yo."

 

'Ma yenê mexdûrkerdene'

 

Semra vat, 8 mengî yo grev dewam keno û wina qiseykerdişê xo qedêna: "Zere de tepişteyan mexdûr kenê, teber de zî ma mexdûr kenê. Bi di serrî yo semedê ekonomî ez nêeşkena şêrî pêvînayîş. Di tutê mi estê. Ez kîra de ya. Ez çîyêk nêwazena. Yewin waştişê mi sererastkerdişê şertê tepişteyan o. Ganî ma wayîrê waştişê tepişteyan vejîyê."