Sena Dolar

 

STENBOL - Parlamentera HDPyî ya Stenbolî Zuleyha Gulum derheqê kampanyaya ‘feqîrîyê cinîyan rê ney' de qisey kerd ke hedefê înan oyo ke zemînêko rêxistinkerde awan bikerê û vat: "Ganî xeyalê cinîyêka newe ya feqîrî werte ra wedarnena bêro mûnayîş. Ma cinî eşkenê wina bikerê."

 

Meclîsê Cinîyan ê HDPyî startê lingê diyîn ê kampanyaya ‘feqîrbîyayîşê cinîyan rê ney' 5ê Nîsane de Stenbol de da. Harêma Marmarayî yê Bursayî de meclîsê cinîyan bi karkerê tekstîl û ramitişî dir ameyî têhet û Kocaeli de zî bi cinîyê kedkarê keyeyî û bi muzîsyenê cinîyan dir ameyî têhet.

 

Kampanya hîrê mengî yo dewam kena û xeylêk herêman de xebate dewam kena. Parlamentera HDPyî ya Stenbolî Zuleyha Gulum derheqê  kampanya de ajansê ma rê qisey kerd.

 

'Cinî bi mantiqê koletî yenê xebitnayene'

 

Zuleyha vat, cinî demê pandemî de rastê nêheqî ameyê û wina qal kerd: "Prosesê pandemî de desteştiş û şîdetê vera cinîyan zêde bi. Cinîyî kargerîyan de sey kole yenê xebitnayene. Cinîyî bi tehdîdê kar eştişî dir ameyê rî bi rî. Bi madeyê Kod-29 cinîyê karkerî kar ra ameyî eştene. Gama ke bi nê kodî bêrê eştiş, tu heqê înan nêmaneno. Pêvînayîşan de çîyo tewr zêde vejîya werte, xebatê cinîyanê keyeyî bi. Karsazan lazimî heme serê cinîyan de bar kerd."

 

'Ma do feqîrîyê cinîyan ramojnê'

 

Zuleyha dewam de wina vat: "Cinî sektorê cîya de xebityenê la her ca de serdestîyê camêrdan esto. Her ca de cinî bi heqdestê kêm yenê xebitnayene. Her tewirê teda serê cinîyan de esto. Bi kampanya hedefê ma oyo ke feqîrîyê cinîyan ramojnê. Ma problemê cinîyan xeylêk anê ziwan."

 

'Ganî paştdayîş bêro mûnayîş'

 

Zuleyha tewr peyîn wina vat: "Semedê safîkerdişê probleman di nûqteyê esasî estê. Yew rêxistinbîyayîşê cinîyan o diyîn ganî îqtîdar bikewo mîyanê tevgerî. Eke têkoşîno hempar nêbo safîkerdiş zî nêbeno. Ganî merdim zor bido îqtîdar. Ma do kampanya hîna hîra bikerê. Ma Marmarayî de herêmê; Bursa, Kocaelî û Stenbolî de serdayîş kerd. Ma Stenbol de bi cinîyê muzîsyenan dir ameyî têhet.  Wareyêko zehmet o. Garantîyê karê înan çin o, qeydê sîgorte çin o. Xeylêk probleman ciwîyenê. Ma Bursa de bi karkerê tekstîlî dir ameyê têhet. Şertê xebata înan zaf zehmet o. Ma Bursa de bi cinîyê karkerê ramitişî dir zî ameyî têhet. Semedê xebate koç kerdê û xeylêk probleman ciwîyenê. Çadiran de problemê weşîye ciwîyenê. Ma do feqîrîya cinîyan bi cuya neweyîr dir werte ra wedarnê. Hedefê ma bingehêkê bi rêxistinbîyayîşê cinîyan o."