Şehrîban Aslan

 

AMED - Dewaya ke tutêk/e, Fîkret Ertogan û Tuna Ertogan hêrişê cinsî ci rê kerd de, îstînafî qerarê beratê ke dadgeha herêmî semedê şikdaran dî bi, ca de dî.

 

Qezaya Sûrî ya Amedî de 2018ine de tutêk/e rastê îstîsmarê merdimê xo Fîkret Ertogan û birayê xo Turan Ertogan ame. Tutî/e çîyê ke cuyabî embazanê xo ra vat û dima ra mamosteyî pê hesîyayî. Mamosteyan zanayîş da polîsan û 8ê Gulana 2018 de şikdarî ameyî destbendkerdene û rojêk dima bi şertê kontrolê edlî ameyî veradayene.

 

Îdianame ame amadekerdene 

 

Serdozgerîya Komara ya Amedî semedê Fîkret Ertogan sucê ‘îstîsmarê cinsî yê tutî/e' û ‘kesî/e azadî ra bêpar verdayîş', Turan Ertoganî rê zî sûcê ‘îstîsmarê cinsî yê tutî/e' îdianame ame amadekerdene.

 

Tutî/e îfadeyê xo peyser ant

 

Îfadeyê tutî/e Merkezê Taqîbkerdişê Tutan (ÇÎM) verê dozgerî de ame girewtene. Îdianameya ame amadekerdene, Yewin Dadgeha Cezaya Giran ya Amedî ra ame qebulkerdene û tut/e prosesê dadgehe de îfadeyê xo peyser ant û tutî/e vatibi ke bi talîmatê mamosteya rehberî de îfadeyê ewil dayo/a.

 

Cîya cîya qerarê beratî 

 

Peynîya muhakemekrdişî de derheqê di şikdaran de qerarê beratî ame dayene û qerar de bi bahane wina vatî: "Sûcê şikdar Turan Etogan û Fîkret Ertogan ameyê kerdene, semedê nêsabir ê, sûcê musnet şikdaran rê cîya cîya qerarê beratî ameyo dayene.

 

Îstînafî qerarê beratî da 

 

Yew avûkata dewa Elîf Tîrenç Îpek Ulaş  qerarê beratî berd îstînafî. 17in Daîreyê Cezaya Dadgeha Edliyeyê Herêmî ya Dîlokî bi eynî bahaneyî qerar xira kerd. Elîfe nê ser 18in Daîreyê Cezaya Dadgeha Edliyeyê Herêmî ya Dîlokî de îtîraz kerd û dadgehe îtîraz red kerd û vat, qerar goreyê usûlî yo.

 

Tehdîdê hemverê mamosta nêvîna

 

Sewbîna seranserê prosesê dewa de mamosteya ke rewşe vet werte, hetê keyeyan ra tim rastê tehdîdî ameye û mamoste mecbûr mendebî ke mektebî ra fek vera bido. La dadgehe nê tehdîdan zî nêwaşt bêvîno.