Hîkmet Tunç

 

WAN - Derheqê 7 cinîyan de bi sebebê ke vernîya ‘pêvînayîşê cinîyan’ yê Wan de bi sloganê ‘Pêkerdişê Stenbolî danê ciwîyayîş’ û serê çapemenî de vengdayîşê tewrbîyayîşî kerdê, îdianame ame amadekerdene.

 

Pêkerdişê Stenbolî 20ê Adare de bi qerarnameyê serekomarî amebi fehskerdene û 1ê Temmuze de zî bi pêroyî ame wedaritene. Di serrî bi ke pêkerdiş hem rojeva îqtîdarî hem zî rojeva cinîyan de bi. Vera nê cinîyan reaksîyonê her wext ramojna. Cinîyê ke îtîrazê betalkerdişê pêkerdişî kerdî zî cezayê pere û cipersayîşî dayî destpêkerdene. Cinîyan rê îdianame ame amadekerdene.

 

Endamê Tevgerê Cinîyan ê Azadan (TJA) û Partîya Demokratîke ya Şaran (HDP) yê Wanî, semedê rayrayîşê ke waştêne 10ê Nîsane de bikerê, vîdeoyêk serê çapemenîya komelî de pare kerdî. Semedê nê  22yê Nîsane de îfadeyê 7 cinîyan ame girewtene û derheqê înan de îdianame ame amadekerdene. Mîyan de endama HDPyî ya Meclîsê Şaredariya Tuşbayî Ayşe Mînaz, hemşaredara Bêgiriyî ke qeyûm tayînê vera ci bi Leyla Balkan û Ceyda Dîndar ke semedê dosyayêk nika zîndanê Tîpê T yê Wanî de tepişte ya, bi pêroyî 7 cinîyan bi îdiayê ‘muxalefetê rayrayîş û kombîyayîşî kerdê’ do vejîyê vernîya  dadgerî.

 

‘Ma hemverê her tewir şîdetê cinîyan ê’ 

 

Ayşe dîyar kerd ke îfadeyê xo yê emnîyetî dîyar kerda ke vengdayîşê ci semedê heme cinîyê şaristanî nîyo û wina vat: “Ma hemverê her tewir şîdetî yê cinîyan ê. No vengdayîşê ma zî no vano. No vengdayîşêko ke serebûtê komelî sûr bikero. Wextê ça nê vengdayîşî kerd, qanûnê xo yê ke rayrayîş û mîtîngî ameyo nasnayene, xebitna.”

 

‘Ez nêwazena hetê camêrdêk ra bêra qetilkerdene’

 

Leyla zî dîyar kerd ke îfadeyê xo yê emniyetî de dîyar kerd ke vîdeo serê hesabê çapemenîya komelî pare kerda û wina vat: “Sey cinîyê ke yenê qetilkerdene, ez nêwazena hetê camêrdêk ra bêra kiştene. Pêkerdişê Stenbolî cinîyan pawitêne. Ez wayîr vejîyena. Heqê min o tewr xozayî yo. Ez pêro cinîyan dawetê têkoşînî kena.”

 

Cinîyê ke vejîyê vernîya dadgerî wina yê: Îdarekara HDPyî ya Wanî Nurcan Kayar, Hemsereka HDPyî ya Rayîrê Armûşî Canan Uzunay, aktîvîsta TJAyî Dîlan Yildiz, Endama meclîsê şaredariya Tuşbayî Ayşe Mînaz, hemşaredara Bêgiriya ke qeyûm tayînê vera ci bi Leyla Balkan, endama Komeleya Cinîyan a Starî Rojbîn Bor, Ceyda Dîndar ke zîndanê Tîpê T yê Wanî de tepişte ya.

 

7 cinî  do 11ê Kanûne de vejîyê vernîya dadgerî.