RIHA - Vernîya serdayîşê Hemsereka Pêroyî ya HDPyî ya Pervîn Bûldan ya Rihayî, Emîne û Ferît Şenyaşar ameyî destbendkerdene.

 

Emîne Şenyaşar ke mêrde û di lajê ci hetê merdimanê Parlamenterê AKPyî Îbrahîm Halîl Yildiz ra vernîya weçînayîşê 24ê Hezîrana 2018ine de amebî qetilkerdene û lajê ci Ferît Şenyaşar semedê caardişê nobeta xo ya "Edaletî" ya roja 128ine de vejîyayî rayîr. Polîsan Emîne Şenyaşar û lajê ci Ferît Şenyaşar yê semedê çalakîya nobeta xo ya "Edaletî" şîne Riha, dekewtişê şaristanî de vindarnayî û çarçewaya cipersayîşê bi îdiayê “Heqaretê karmendî yê îstîmlakî" ameyo akerdene de reyke bîn înan destbend kerdî û berdî Mudurîyetê Polîsan ê Rihayî. 

 

Pervîn Bûldane ameye şaristan 

 

Demê Emîne û Ferît ameyî destbendkerdene, Hemsereka Pêroyî ya Partîya Demokratîke ya Şaran (HDP) Pervîn Bûldan zî semedê serdayîşê esnafan û pêvînayîşê bi şarî dir ameye Riha. 20ê Gulane de verê ke Pervîn Bûldan ke serdayîşê keyeyî bikerdêne reyna Emîne û Ferît amebî destbendkerdene. Reynakerdişê destbendkerdişî yê ewro zî bale ant.