Melîke Aydin

 

ÎZMÎR - Hemsereka ESPyî ya Stenbolî Ezgî Bahçecî dîyar kerd ke Zîndanê Şakranî yê Cinîyan de tedayî zêde bîyê û tepişteyî hemverê ferzkerdişê poşmanî bi rêxistinkerdişî têkoşîn kenê. Ezgîye dîyar kerd ke tepişteyê ke grevê vêşanîye de zî bi qerar çalakîya xo dewam kenê.

 

Hemsereka Partîya Sosyalîstî ya Bindestan (ESP) ya Stenbolî û endama Heyetê Îdarekara Merkezê Meclîsê Cinîyan ê Sosyalîstan Ezgî Bahçecî ke 6 mengan Zîndanê Cinîyan ê Şakranê Îzmîrî de mende, 6ê Temmuze de roniştişê diyîn de ameye tehlîyekerdene. Ezgîye ke 6 mengan tepişte mende şert û mercê zîndanî ercna. Ezgîye bale ant serê ‘ferzkerdişê poşmanî’ yê hemverê tepişteyan.

 

'Dimayê ke hacetan kom kerdêne kantîn de rotêne'

 

Ezgîye dîyar kerd ke bi qanûnê înfazî ke ameyo vetene, caardişê kêfî kerdêne û vat: "Roja kantînî ameyîne, reyan erey vetêne pêvînayîşê telefonan. Cigêrayîşê qawişan de tehrîk kerdêne. Poşetan bigîrê heta layê ke cil û belgê xo yê şite ma fînayîne ra, heta hacetê rojane ke ma pê cuya xo dewam kerdêne, her çî arêdayîne. Nê hacetî xora kantîn de ameyîne rotene û hacetê ke kom kerdêne, kantîn de rotêne."

 

'Ma nêeşkayîne waştişnameyê xo taqîb bikerê'

 

Ezgîye wina vat: "Semedê kargoyê kitaban sînorkerdiş ardibî û vurnayîşê kitaban bi 5 heban amebî sînorkerdene. Pêwa ke muracatê kitabxaneyê îdare ameyîne kerdene zî reyan ma teber ra weşan nêgirewtêne. Her tewir kitab ameyîne astengkerdene. Çi heyf ke cayêko merdim gerre bikero zî çin o. Dadgerê înfazî zî sey îdareyê cewaban dano. Coka merdim nêeşkeno heqê xo bigîro. Ma nêeşkayîne waştişnameyê xo zî taqîb bikerdêne. Ganî hûmara waştişnameyî biameyîne dayene la o zî nêdayîne."

 

'Grev bi qerarêko pîl dewam keno'

 

Ezgîye bale ant serê grevî û vat: "Dimayê çalakîya tepişteyan, cezaya dîsîplînî dayîne tepişteyan. Bi no hawa, heqê çalakî ameyîne binpaykerdene. Cezayê dîsîplînî yê cîya dayîne tepişteyan. La pêwa nê grev bi qerar dewam keno. Sewbîna tehlîye zî bi kêfî yenê taloqkerdene. Tepişteya bi nameyê Merve Nur Îşleyîcî bi bahaneyê bi kesêka pêvînayîşê telefonî ci dir çin o pêvînayîş kerda, ‘Rêziknameyê Derheqê Ercnayîşê Tepişteyan ê bi Merkezê Sinifkerdişê û Taqîbkerdişî’ tehliyeyê ci ame taloqkerdene û vatî, do menga teşrîna peyêne de biercnê. Ozgur Şîmşek zî pêwa tehliyeyê co amebi semedê qiseykerdişê telefonî nêkerdo zî cezaya dîsîplînî ci rê ameye birnayene."

 

Ezgîye tewr peyîn vat, tepişteyan rê poşmanî yeno ferzkerdene û wina vat: "Hemverê nê tepişteyî têkoşînê rêxistinkerde danê."

 

Ezgîye peynîya qiseykerdişê xo de veng da heme kesî kerd ke bi tepişteyan dir bikewê mîyanê paştdayîşî.