Hîkmet Tunç

 

WAN - Pêwa ziwatî, bi krîzê ekonomî û zamê ke yenê kerdene de ramitiş û pesdewarî êdî zehmet bîyo. Welatijê ke bi zor debara xo kenê, nê vengdayîşî kerdî: "Ganî zamî bêrê vindarneye û vayî bêrê fistene. Ganî semedê pesdewarî û ramitişî zî paştdayîş bêro dayene."

 

Pesdewarî û ramitişê ke yewin çimeyê debara herême yê û polîtîkayê şaşî yê îqtîdarî bi tesîr bîyê, emsar ziwatî zî da piro. Herême de emsar semedê nêvarayîşê vewre û varanî, ameyîşêk baş nêkewt dest. Semedê krîzê ekonomî û vayîyê zêde, welatijê ke debara xo bi pesdewarî û ramitişî kenê zî zehmetîyan ancenê û welatijî hewl danê ke na rewşe ra xilas bibê.

 

'Berardiş xeylêk rey destê ma de maneno'

 

Esmer Kumlî ya ke bi rojan semedê genimê xo yê qilê koyê Erekî Wanî de xebityaya, vat, emsar zêde awe çinbî, erd wişk mendo û wina vat: "Wextê ma berardiş ramnenê, xeylêk vayo la rotiş de xeylê rey destê me de mendo. Semedê ke kes nêgîno. Sewbîna pesdewarî de zî eynî çî babeta vatişî yo. Semedê vayîye xeylê rey ez vana dewaranê xo nêroşî, semedê ez biroşî do erjan şêro. La demo ke ma hewl bidê bigîrî di qat vay o."

 

'Vernîya ma zimistan o ma nêzanê debara xo senîn bikerê'

 

Esmere dewam de wina vat: "Ez bi şitê manganê xo û genimê ke ma ramito debare kenê. La ne şit û ne zî genimê ma pere keno. Ha şima vînenê, ez bi pakitî, werd û heywanan dir eleqedar bena. Ez bi mêrdeyê xo dir şina serê erdî. Vernîya ma zimistan o, ez nêzana ke ma senîn debara xo bikerê. Bendewarîyê mi kesî rê çin o. Ma kede danê, semedê nê zî wazenê heqê ci bigîrê."

 

'Semedê zamî berardiş serê erdan de do bimano'

 

Esmere vat, serra vîyarte de 100 kîlo genim ke 10 kîloyî ci bi 50 TL girewta erd ramita û vat: "Planê ma oyo ke ma berardişê zêde biroşê û şîyayeyê mutbaxê xo bikerê. Emsar semedê pere çinbi ma bîçere nêard, ma bi usulê verê genim kom kerd. Semedê zemê ke yeno kerdene, do berardişê ma serê erdî de bimano. Me genim arêda la ma nêeşkenê veng bidê patoz û bîçerî. Ganî vayî bêrê fistene. Ganî paştdayîş semedê pesdewarî û ramitişî bêro dayene."