Sema Çaglak 

 

ÊLIH - Hemşaredara HDPyî ya Êlihî ke vera ci qeyûm amebi tayînkerdene Songul Korkmaz, dîyar kerd ke problemê awe dewamîyê polîtîkayê pelçiqnayîşî yo û vat: "Probelmê awe ne problemêko nêro çareserkerdene yo. Ganî bêro çareserkerdene û welatijî na rewşa mexdûriyetî ra bêrê xilaskerdene.”

 

Dewanê Zîlan, Selîvê, Kanîkê, Malê Gir, Hiskut, Holê, bajarokê Kaniyahênî û xeylêk dewê bînî ke serê qezaya Hezo ya Êlihî de yê, 23ê hezîrane de bêawe ameyê verdayene. DEDAŞî bi bahaneyê ke “Deynê ceryanî semedê awe nêno dayene” ceryanê dînamoyê nê dewan birnayo û 21 rojî yo bi hezaran welatijî nê dewan de bêawe mendê. Reaksîyon û nêrazîbîyayîşê welatijan serê rewşe de her ke şino zêde beno. Na babete ser o Hemşaredara HDPyî ya Êlihî Songul  Korkmaz ke vera ci qeyûm amebi tayînkerdene, ajansê ma rê qisey kerd.

 

‘Semedê bêawîye nêweşî zêde bîya’

 

Songule diyar kerd bêawî ra nêweşî zêde bîya û vat: “Nê seserrî de yew problemo tewr pîl û girîng bêawîye yo. Eke semedê polîtîkayê dewlete nê seserre de komel bêawe bimano, bi tena sereyê xo problemêko pîl o û ganî no problem bêro çareserkerdene. Awe semedê merdiman lazimîyêkê cuye yo. Welatijî semedê awe peyda nêkenê kanal û newalan ra bi bîdonan gênê û anê keyeyê xo. La semedê awa pak nêya, xeylêk tutî nêweş kewtê. Şaristanê Êlihî yew şaristanêko tewr germ o û no hawayê germî de welatijî bêawe yê.”

 

‘Welatijî semedê problemê awe koç kenê’

 

Songule bale ant serê dewijan û vat: “Rewşa roniştoxê dewe xeylê xirab a. Dewijî bi rojane semedê ke vengê xo bidê eşnawitiş, hewl danê. Ganî her kes vengê înan bido eşnawitiş. Eke no problem tewr zêde pîl bibo, do kam cewab bido. Semedê her keyeyî cezaya 100-150 hezar pere ameya dayene. Ê dewan ra tu kes nêeşkeno ê pereyî bido. Welatijî semedê bêawî koçberî sey çareserî bivînê. Eke welatijî semedê bêawî wareyê xo ra koç bikerê, do nêro qebûlkerdene. Problemê awe eşkeno bêro çareserkerdene. Ganî bêro çareserkerdene û welatijî na rewşa mexdûriyetî ra bêrê xelaskerdene.”

 

‘Dewamê polîtîkayê pelçiqnayîşî yê’ 

 

Songule tewr peyîn wina vat: “Serra 2019 de zî eynî taktîkî kerdibî. 3 rojan semedê qeyûm înan rê vetibi bêawe mendibî. Nika eynî polîtika Mêrdîn û Şirnex te zî yeno kerdene. Xora pêro şaristanê hereme de polîtiîkayê cîya aver berdî. Êlih û Mêrdîn de zî polîtîkayêk derheqê awe de yenê averberdene. Çewlik, Amed, Şirnex û Dêrsim de zî daristanan veşnenê. Şaristanê bînan zî polîtîkayê cîya aver benê. Nê pêro girêdayeyê yewbînan ê. Bi vêşanî, tepiştiş, zulm, teda û zordarî heta nika waştî ma bipelçiqnê, nika zî bi bêawî wazenê polîtîkayê pelçiqnayîşî dewam bikerê.”