Medya Uren

 

MÊRDÎN - Şeyhmus Koç Zîndanê Gîresûnî de maneno, demo yeno tepiştene îşkence bi ci kenê. Hetê psîkolojî û fîzikî de problemê ci vejênê. Dayîka Şeyhmusî, Şukran Koç endîşeyê xo ma dir pare kerd. Şukrane vat: "Lajê mi bi îşkenceyê dewlete nêweş kewt û nêno tedawîkerdene. Nê zulmî rê êdî bes o! Wa selahîyetdarî, parlamenterî, sîyasetmedarî û şar wurzo serê lingan. Ma eşkenê bi serewedaritişî peynîya zulmî bîyarê."

 

Şeyhmûs Koç ke xoverdayîşê îdarekardişê  xoserî yê Nisêbînî de amebi tepiştene û îşkence bi ci amebi kerdene û yeno tecrîdkerdene. Dimayê îşkenceyê hetê fîzikî û psîkolojî problemê ci vejîya. Heta nika nêameyo tedawîkerdene û her ke şino rewşa ci kewena tehluke. Dayîka Şeyhmusî, Şukrîye Koç zî derheqê rewşe û endîşeyê xo ajansêma rê qal kerd.

 

'Lajê mi bi îşkenceyê dewlete nêweş kewt û nêno tedawîkerdene'

 

Şeyhmus vernîya 6 serrî,  20 serrîya xo de Nisêbîn de ame destbednkerdene. Vernîya ke bêro destbendkerdene 5 cayê bedenê ey de parçe estbî. Demê ke îfadeyê ci yeno girewtene zî îşkence kenê. Nika Şeyhmus hetê psîkolojî de zî problemê pîlî ciwîyeno. Prosesê 6 serrî de ne parçe bedenê ci ra vetê û ne zî hetê psîkolojî de tedawîyêk ci rê kerdê. Şeyhmus hem tepişteyo nêweş o û hem zî tecrîd de yo. Dayîka ey Şukriye Koç hêrsê xo yê hemverê tecrîd û îşkence ramojna û vat: "Nêzdîbîyayîşê hemverê tutanê ma nêzdîbîyayîşê bêhuqûqî û merdimayî yo. Lajê mi bi îşkenceyê dewlete nêweş kewt û nêno tedawîkerdene."

 

'Ma eşkenê bi serewedaritişî peynîya zulmî bîyarê'

 

Şukriye bale ant serê tecrîdê tepişteyê sîyasîyan û vat: "Bi seyan tepişteyê sîyasî tecrîd de yê. Waştişê ma yê dayîkan oyo ke tecrîdê serê heme tepişteyê sîyasî bêro wedaritene. Bi hezaran tepişteyî eynî eziyet de yê. Nê zulmî rê êdî bes o. Wa selahîyetdarî, parlamenter, sîyasetmedar û şar wurzo serê lingan. Ma eşkenê bi serewedaritişî peynîya zulmî bîyarê. Wa êdî dayîkî nêbermê. wa tutî zî pey dayîk û pîyê xo nêbermê. Tutê ma nê zulmî vînenê û pîl benê. Binê nê tesîrî de manenê."