Medya Uren

 

MÊRDÎN - 1ê Temmuze de roja ke Pêkerdişê Stenbolî bi qerarê serekkomarî ame wedaritene, Ayşe Sezayî camêrdê ke ci dir zewicnayebî hetê Nevzat Dogma ra ameye qetilkerdene. Datkênaya Ayşe, Mewlude Çelebî ke demê hemverê wedaritişê Pêkerdişê Stenbolî tewrê eşkerayî bîbî, xebara qetilkerdişî eşnawena wina vat: "Ma hemverê qetilkeran vera her çî xo ver danê."

 

Ayşe Sezayî (40) ke bi eslê xo Kerboranê Mêrdînî ra ya 15 serrîya xo de bi lajê xala xo Nevzat Dogma dir yena zewicnayene û Şemzînan de bi ca bena. Nevzat Dogma semedê sûcê eroyînî ceza gêno û şinê Herêma Federe ya Kurdistanî de bi ca benê. Ayşe Sezayî ke dayîka 5 tutan a 1ê Temmuze de hetê camêrdê ke ci dir zewicnayeya yena qetilkerdene. Datkênaya Ayşe, Mewlude Çelebî derheqê babete de ajansê ma rê qisey kerd.

 

'Vengê ci nêame eşnawitene'

 

Mewlude dîyar kerd ke vengê Ayşe nêameyo eşnawitene û vat: "Hema Ayşe 15 serrî bî û bi zerrîya xo nêameye zewicnayene. Dimayê ke tutê ci virazyayî, musa ke camêrdo ke ci dir zewicnayebî karê eroyînî keno. Her ke xo û şarî jehrî kerdêne, ameyîne keye dayîne Ayşe ro. Nêverdayî Ayşe tutîya xo biciwîya û o camêrdî zî nêverda cuya xo de rehetî bivîno. Dimayê ke ceza Nevzatî rê ame ê remayî Herêma Federe ya Kurdistanî. Ayşe dayîka 5 tutan bî. Tewr pîl 23 serre û qij zî 3 serre yo/ya. Gama ke boya Nevzatî bîne teng dayîne tutan ro zî. Oyo ke tewr zêde Ayşe dejnayîne no bi.  Telefonê pîyê xo kerd û serebût qal kerd. La reyna zî vengê ci nêame eşnawitene."

 

'Ma do hemverê qetilkerdişî sere nêdanê ro û ma do têkoşîn bikerê' 

 

Mewlude vat ê qet sere nêtewênenê û wina dewam kerd: "1ê Temmuze de seke yeno zanayene, Pêkerdişê Stenbolî ke bi serran o rojeve de yo, bi hawayêkê fermî hetê serekkomarê Tirkîya ra ame wedaritene. Semedê nê zî bi rojan bi ma sey cinî wareyan de bî. Ma vengê xo berz kerd. 1ê Temmuze de wextê ma eşkerayî de bî, xebere amî ma rê ke Ayşe hetê Nevzatî ra ameya qetilkerdene. Tirkîya de kiştoxî bêceza yenê verdayene. Ma bi dejê Ayşe aciz bî la ma do sey a roje tim serê lingan de bê û ma do hemverê qetilkerdişê cinîyan sere nêdê ro û têkoşîn bikerê."

 

'Tutê aye persê aye kenê'

 

Mewlude bale ant serê tutanê Ayşe û wina vat: "Ma heta ke tutê Ayşe ardî vakur ma zaf aciz bî. Coka ma nika ardê û bi taybet herdi tutê aye qijî zaf persê aye kenê. Vanê do dayîka ma key bêro. Verê înan de dayîka înan ameye qetilkerdene û no zî hişê înan ra nêvejîyeno. O wext zî tersan ra remayê keyeyê cîranan."